بلا هبل


إمبارح اتفرجت على فيلم بابل

الفيلم كان رائع اخراجه جامد و من اصغر طفل فيه

لأكبر نجم فيه كان تمثيلهم فوق الوصف

مع اني شايف ان الممثلين المغاربة فيه كان تمثيلهم اقوى

المهم ان الفيلم ده بيحكي إزاي ان كل شخص في العالم ده بيأثر في الشخص التاني حتى لو على بعد الالف الاميال

من غير ما يعرف

ان العالم ده كله حاجة واحدة بتأثر في بعض

على الاقل انا فهمته كده

الفيلم بيحكي حكاية واحد ياباني عنده بنت خرسه و مراته كانت انتحرت

و بنته ليها قصة لوحدها و هو كان مرة في المغرب بيصتاد

قام اهدى بندقيته للدليل المغربي اللي كان معاه

و الدليل المغربي باع البندقية لراعي غنم عنده طفلين بيرعوا الغنم و بيخدوا البندقية معاهم

و هم كانوا مرة بيهزروا بالبندقية ضربوا رصاصة جت في وحدة امريكية كانت سايحة في المغرب هي و جوزها

و كانو سايبين ولادهم مع المربية المكسيكية في امريكا اللي خادت ولادهم و راحت تحضر فرح ابنها في المكسيك

يعني لفه كبيرة قوي

و طبعا امريكا قالت ان دي حادثة ارهابية كالعادة و قلبت الدنيا

الفيلم كان فيه واحد مترجمه من الاخوة الجمال قوي

بتوع عليك اللعنة و تبا لك

المهم و انا قاعد قدام الكمبيوتر و بتفرج على اخر مشهد

و المشهد قوي جدا و جامد قوي الاقي الاخ المترجم كاتب تعليق على احداث الفيلم

التعليق بيقول

(من اجل عاهرة امريكية تقوم الدنيا .. اين هم من قتلانا باللأف؟؟ )

اقوله أيه ده والنبي

هو غلطت الدول المحترمة انها بتقلب الدنيا علشان حد منها اتأذى

ولا دي غلطت حكوماتنا الهبلة

هو انت بتحاسبهم علشان بيهتموا بشعوبهم و مش بيهتموا بشعوبنا؟؟

مين اللي مفروض يتحاسب

حكوماتهم ولا حكومتنا

انت زعلان منهم ليه

هما المفروض يهتموا بينا ليه

و اصلان حكوماتنا منفضلنا

بطلوا رمي الغلط على الغير

و حاولوا تصلحوا في نفسكم الاول

لأن طول ما بنرمي سبب خيبيتنا على غيرنا

يبقى عمرنا ما هانبقى دول محترمة

سلام

دولة المنفضين

تعرفوا ايه اللي لو شعب مصر دخل فيه مسابقة هايطلع الاول ؟
التنفيض
احسن شعب ينفض حتى لنفسه
حتى العامية بتاعتنا فيها معاني كتيرة قوي للتنفيض
زي .. احلق .. فكك .. طنش .. كبر
مافيش لغة في العالم فيها المعاني الكتير دي للكلمة الا عندنا
و بما اننا شعب عملي جدا طحن موووت
فاءننا بنطبق الكلام على نفسنا بالحرف
وبنسبق اي حد في التنفيض
لدرجة اننا بنفض لنفسنا
و بقوة
فا اغلب الشعب منفض للقرف اللي هو فيه
و بيتفوق على نفسه و بيدعي للي قارفه
السؤال اللي بتسألوه دلوقتي انا بجيب سيرت الكلام ده ليه دلوقتي
ما كل العالم عارفه ده
اللي خالاني اجيب سيرت الموضوع ده
التنفسض اللي حاصل من كل اللي اتحرق دمه علشان عماد الكبير
و اول ما الفيديو بتاعه نزل قام و هلل و شتم و لعن وسب البلد كلها
و بقى مشهور و الناس تتصل تسأله على اخر الاخبار
و تيجي يا عم انك تشوفه حاضر جلسة واحدة من قضية عماد ... ابدا
انا مش قصدي حد معين
انا قصدي ناس كتير
و قصدي الشعب ده كله
اللي كل ما تسأل حد فيه على القضية
يقولك دول ظلمه.. ربنا ياخدهم
على اساس ان ربنا ينزل العذاب عليهم من كتر الدعاء
شفته غباء زي كده
ربنا هيعمل ليه اصلا حاجة لشعب منفض لمصلحته
القضية دي اول حاجة عرفنا نمسكها على الجزم
و العالم كله عرف انهم ظلمة .. لدرجة انه كان احد اسباب كشفهم لفضيحة ان الامريكان بيجيبوا ناس تتعذب هنا
و ناس كتير بدأت تشتكي و تتكلم
و ناس كتير بدأت ترجعلها حقوقها
مش بقه كلنا نتلم و نقف وراه
لأ .. الكل نفضله
بقينا انا و شرقاوي و اسد و الحاج جرجس وجبهه التهييس و ذا سنفل انجل بس اللي ينحضرله
و لو حد فينا مجاش مرة لظروف عنده بيجي الجلسة اللي بعديها
و سعات جيمي ومالك و رشا
بيجوا بس شغلهم مش مساعد
و الكلب الظالم فيه ناس كتير قوي بتحضر معاه
محدش فكر في نفسية عماد لنا يلاقي الناس منفضاله
و اللي ظلمه الناس واقفة جنبه
انا كل مرة بدعي الناس تحضرله
بس زهقت
اصل لو موقفناش الناس دي عند حدها
هايجي اليوم ده و يحصل اللي حصل لعماد لأي منفض
فاللي عايز ينفض يفقض
بس مايستناش حاجة من حد بعد كده
و اللي عايز تفاصيل يبقلا يقراها عند جبهة التهييس
و هيلاقي صور كمان
و يتفرج في بيته و هو بيشرب شاي
مش عايزين منه حاجة
سلام


محاكمة الزفت بكره



تحديث
................................

الجلسة اتأجلت ليوم الاربع الجاي
محاكمة الزفت بكره

في دار القضاء العالي

ياريت الناس كلها تبقى هناك

علشان نشوف نهايته على ايه

صباحية مباركة

شفته ياولاد اللي حصل امبارح
العريس جينا نحيه في دخلته
قاموا بعتولنا حراسة علشان نحتفل بيه براحتنا


اللي حصل بقه ان امبارح لقيت اسد باعتلي بيقولي الفرح بتاعنا اتلغى
علشان الامن مالي الميدان و مش هانعرف نحتفل بالعريس
قام كل المعازيم راحوا قعدوا على القهوة
يشربوا و يضحكوا
والمعلمين متكدرين في الميدان
و باعتين امن مركزي و اسعاف و مطافي


ليه يا جماعة
ده احنا كنا جايين نحتفل بالراجل
مش جايين نتظاهر ولا حاجة
الله يحرقهم قطعوا عليا كنت ناوي ابعلي صندوقين بيرة (خالية من الكحول) في الفرح
وكمان بعتوا ناس للمعازيم يقولولهم والنبي ماتعملوش حاجة
سيبوا الراجل يفرح
شفته الادب في التعامل
ولاد ناس برضه الامن بتاعنا ده
والله حاجه تضحك
للدرجادي الامن ده بقه بيخاف منا و بيعملنا حساب حتى لو كنا بنهزر
كويس علشان هما كده بدأوا يفهموا ان احنا خلاص
مابقيناش نعرف نسكت
او نسينا ازاي اننا نسكت
على اي حال
اهوالعريس دخل؟؟؟ و ده خبر غير مؤكد!! هيهيهي
و راح باغيس.. باريس بالفرنساوي
قشطة يا عم
احد التحليلات انه سافر على طول بعد الفرح
ان مافيش حد يخبط عليه (
اسواء عادة مصرية) يوم الصباحية و يسأل العروسة
هااااااا ...... عملتوا ايه ؟؟؟
يالهوييييييييييييييييييي
.......................................
الصور من عرباوي

دخلتها بعد بكره .... قصدي مصر


بقالي كتير مكتبتش حاجة

حتة امي خادت بالها من ده

مش لاني مش عارف اكتب

بش لان مافيش حاجة تتقال

و كمان مطحون في الشغل

و ما شفتش عرباوي بقالي فترة

و الراجل ده لنا بشوفه كتير بحب اكتب

و سبب بيني و بينكم

اصل الشركة بتاعتنا ادتني خط مفتوح

بس برضه السبب الرئيسي ان مافيش احداث

و الحياة مملة قوي

الناس بتقولي حايحصلنا ايه اكتر من كده

اقولكم

اصل السواد لسه جاي

الفرح بعد بكره على مصر

كلنا هانتفرج عليه في شرم الشيخ

مصر دخلتها بعد بكره يا رجاله

هاتتدخل تاني زي ما دخلت من 26 سنة

ياجماعة محدش يفهمني غلط

انا قصدي هاندخل عصر جديد

عصر من الحريات الغير مسبوقة

مثل حرية غسل الوش الصبح من غير ما تتهم بالجاسوسية

و حرية التنفس من غير ما تتهم بتكدير الامن العام

دي الحريات اللي احنا داخلين عليها

و اللي اللي بالي بالكم (العريس) هايقنع الناس ان دي احسن حاجة في الدنيا

و الخرة - انا اسف - ان فيه ناس بتصدق ده

و هايدعوله

ان ربنا يحميه

و يخليه

ويعلي مراتبه

بس فيه سؤال مهم جدا و بجد يا جماعة

لازم نعرف اجابته

هل هايشرفنا و هايرفع راسنا بعد بكره في دخلته؟؟؟؟؟

يا جماعة ماتفهامونيش غلط

قصدي في دخلته على مصر

شفته ازاي انتوا ظالميني و مش فاهمني دايما كده
ملحوظة
اكتبولي توقعاتكم لليلة الدخلة
هيهيهيهيهيهيهيهي
قصدي برضه على مصر

......................................

صحيح كلكم معزومين يوم الجمعة

اصل القائم بالاعمال في عزبة الحاج ابو جمال عازمنا كلنا هناك

يوم الجمعة الساعة 6 العصر

ميدان طلعت حرب

لازم نحضر دخلة البلد

..................

سلام