انا مش بتاعتك

بكره العيد الوطني للامارات
كل الناس واخدة اجازة بكره
الاحتافالات مالية الشوارع
من شوية كنت بتفرج على استعراضات في الشارع
من كل بلاد الدنيا فرق شعبية
بترقص و الناس بتصقف
كانوا بيوزعوا اعلام البلد ببلاش
و بكميات كبيرة
لما البنت اللي بتوزع جت تديني علم
رفضت بحركة من ايدي و ابتسامة بسيطة
هي استغربت بس انا سبتها و مشيت
ماكنتش قادر اقولها اني مش متعود اشيل او ارفع علم بلد تانية غير بلدي
حتى لو كان مجاملة
لاحظت ان مصريين كتير قوي شايلين الاعلام و فرحانين جدا كأنه عيد الوطني لمصر
اللي بالمناسبة انا ماعرفش هو امتى
عرفتهم بالحاسة الغريبة اللي موجودة عند كل المصريين
بتخليكك تعرف الشخص اللي قدامك ده مصري ولا لأ مهما كانت ملامحه مختلفة عنا
بس سالت نفسي
هل فرحت الناس دي- المصريين - محاولة للهروب من واقع بلدهم الاليم
يعني مثلا انا افتح التلفزيون على قناة دبي اشوف افتتاح فندق في جزيرة النخلة
اتكلف 20 مليون دولار,,الالعاب النارية و الافتتاح من ابهاره كان ممكن تشوفه من الفضاء
انا نفسي مع اني شفت افتتاحات كتيرة زي الالمبياد اومهراجانات و حضرتها بنفسي
بس عمري ما شفت زي ده .. فما بالك بواحد غلبان من قرية في الصعيد مثلا شافه
في نفس الوقت اللي نقلب فيه القناة على قناة مصرية
تلاقي المذيع بكل قوة يعلن ان رئيس الوزراء امر بفصل انتاج الخبز عن التوزيع
بتوجيهات من الرئيس مبارك حفظه الله
و تلاقي طول اليوم الشريط الاخباري في القنوات المصرية قاعدة تفصل و تهلل للقرار العظيم اللي هايحل ازمة مصر
و القنوات الخاصة كل ما يشوفها يلاقي مصيبة حصلت في البلد
ما بين الناس بتتقتل على يد سيادة الضباط اللي فرحانين بسلاحهم الميري
يا لإما حريقة يا حادثة يا إما اي خبر اسود
طبعا المصري ده هايقلب على قناة دبي
علشان يشوف اكبر افتتاح في العالم و اكبر مطار في العالم و اكبر بناية في العالم و اكبر مول في العالم
و الدنيا زي الفل و الحياة وردية
انا مابقلش ان هنا احسن مكان في العالم
بس الغلبان اللي بايعله قراطين علشان يهرب من الظلم و القرف اللي في بلده
هايكون رد فعله ايه
ماهو كل شوية هايبدأ يبعد بعقله و قلبه عن البلد
و يبدأ بحاول يعمل انتماء للبلد الجديدة اللي هو فيها
بس المصيبة الاكبر في اولاده
اللي هايبدؤا يحيوا علم البلد دي في مدارسهم
و يبدأ يكون ولأهم كله للبلد دي
و مش هايهتموا ببلد (ابوهم) المقرفة المتخلفة اللي كلها مصايب و كوارث
هيحبوا الراحة و النضافة والتقدم اللي البلاد اللي هما فيها رايحاله
و في الخر هاشفهم في الشارع رافعين علم بلد تانية و فرحانين بعيدها
و ناسيين مصر و ناسها و مأسيها
لأن مصر بعدت ابوهم و قالتله انا مش عايزاك
شوف رزقك في حته تانيه
انا مش بتاعتك

هناك ٣ تعليقات:

مهندس مصري بيحب مصر يقول...

طيب ما هو ده الطبيعي
البلاد التانية كلها بقت انضف من بلدنا
ما تقدرش تلوم الناس على حبها لبلد عايشين فيه كويس و بيآخدوا فلوس تكفيهم و تفيض و بيحوشوا منها كمان

لكن صدقني عمر ما المصري ينسى بلده بيفضل فاكرها و نفسه يرجع لها
انا في السعودية بقالي 7 شهور و حاموت من الشوق لمصر و بأعد الايام الفاضلة على الأجازة باليوم

AHMED SAMIR يقول...

بالنسبة للعيد الوطني لمصر
الناصرييت بيعتبروه يوم 23 يوليو والساداتيين ومعاهم المباركيين بيعتبروه يوم 6 اكتوبر
اما عن نفسي...كل يوم مع مبارك يوم عيــــــــــــــــد

دماغ ماك يقول...

مهندس مصري:
انت بقالك 7 شهور دول مش محسوبين
انا بتكلم فيللي بقالوا سنين هنا
واللي بيتولد و يعيش هنا
هما دول اللي بيتأثروا
.......................
سمير باشا
اديك برضه اهو مش عارف عيد لينا الناس متفقة عليه