ده ردي


عارف ان فيه ناس إدايقت من البوست اللي كتبته عن اخر يوم ليا في مصر

ليه بينتها مقرفة كده

و مدام ماشي ماكتب كلمة حلوة احسن

و كمان انا مسافر ليه اصلا مادام بدعي إني بحبها

واللي بيحب مكان مايقعد فيه

بيسيبوا ليه و يمشي

واني لما مشيت ده معناه اني مش بحبها

وده كان سؤال من مريم ليا

ليه ماشي مادام بحبها

هارد عليها بكلام اول مرة اسمعه كان من ابويا ( منك لله يا نوارة ماخلتنيش اشوف الراجل قبل ما امشي) ... المهم

ده كلام عمنا صلاح جاهين

مالقتش رد احسن منه
....................................................................

على اسم مصر التاريخ يقدر يقول ما شاء

أنا مصر عندي أحب وأجمل الأشياء

باحبها وهي مالكه الأرض شرق وغرب

وباحبها وهي مرميه جريحة حرب

باحبها بعنف وبرقة وعلى استحياء

واكرهها وألعن أبوها بعشق زي الداء

واسيبها واطفش في درب وتبقى هي ف درب

وتلتفت تلقيني جنبها في الكرب

والنبض ينفض عروقي بألف نغمة وضرب

على اسم مصر.

فكك مننا بقى


موقف النزهة


بكتب البوست ده من موقف النزهة في اسكندرية
قصدي مطار النزهة
مش عارف اوصف المكان ده اكتر من انه موقف
الحياة في المكان ده سبهللة
كله ماشي
سجاير في صالة الانتظار ماشي
الناس اللي شغالة كلها بتشحت ماشي
فيه قطط من الشارع جوه ماشي
خرطوم التكييف بينقط على كل واحد بيغادر البلد قبل ما يركب الطيارة ماشي
واحد مرجع و الريحة مالية المكان ماشي
فيه مطار في الدنيا يا ناس مافهوش ساعة واحدة خالص تعرف الناس الوقت
فيه مطار في الدنيا مافهوش شاشة تعرف الناس مواعيد الرحلات ايه
مش عايز اكون سلبي
بس بجد كان نفسي اكتب حاجة حلوة عن المكان اللي سايبه قبل ما امشي
بس انا قضيت ليلتي في العجمي
و العجمي من المجاري بقت عبارة عن ..... امممممممممممممممممممممممممم
حد شاف التراك اللي بيعملوه لعربيات الهامر علشان يختبروا العربية دي حاتستحمل الصعاب و الجبال و الانهار و الصحاري ولا لأ
اهو العجمي بقت زي كدة و مفيش كلام تلني اقوله
بكل هذه الذكريات الجميلة ارحل عن مصر
ربنا يسهللي بقه هناك
من موقف النزهة
دماغ ماك
لقطاع البلوجات

سلام


دي اخر ساعة ليا في القاهرة قبل ما أسافر

مش عارف اكتب ايه ولا اكتب ليه اصلا

بس عايز اقول ان مش معنى ان الظروف حكمت اني اسافر تاني

و ارجع اعيش بره قلبي اني هانسى قلبي

دي ارضي و دي بلدي و دي ناسي

دول هما قضيتي في حياتي

انهم يكونوا احسن حاجة في العالم

صحيح ممكن شغلي هنا هايقل لما اسافر

بس برضوا هافضل (وراهم) .. طبعا انتم عارفين مين

هاتوحشني وسط البلد قوي

هايوحشني عم احمد وحسام و نوارة و لوبي و مريم ورغدة و جابر و شرقاوي و سيزر ووائل و اسد و مالك و غربية ومينا و كريمة و راندا و نهى و عبده البرماوي

هاتوحشني البورصة و افتر ايت

هاتوحشني خناقتنا و ضحكنا على القهاوي

كفاية كلام كده علشان مش عارف اكتب

هاتوحشوني

عيد المعذبين السنوي



شاطر يا واد يا يساري

congrats


اخيرا و بعد طول انتظار
مبرووووووووووووووووووووووووووووووووووووووووك
خطوبة
شرقاوي و نيرة

حل جديد


مالقتش فايدة في اني احضر مظاهرة النهاردة
ولا اني اغطي اخبارها
مع اني حضرت بتاعت السنة اللي فاتت
بس انا مابقتش بأمن ان المظاهرات بتاعتنا دي بتعمل حاحة
كل مرة الامن المركزي يلم التلاتين واحد اللي حاضرين في جنب
و يسبهم يهللوا ... يا اما يضربهم و يعتقل حبة منهم و يسيب الباقي يروح
و مافيش اي نتيجة
ممكن لو اعتصام كبير و عدد كبير يجيب نتيجة؟؟
مش عارف .. بس ممكن يجيب نتيجة لو المطالب كانت عمالية مثلا
بس مطالبنا احنا عايزة ثورة يا جماعة
البلد كلها تتحرك فيها
الوقفات اللي بنعملها مزنوقين في اي جنب دي مبقاش ليها لازمة
حتى الاعلام مبقاش بيغطيها زي زمان
طريقتنا في المطالبة بحقوقنا لازم تتغير
انا بفتح المرة دي باب النقاش
يا ريت اسمع اراء تانية
و نتناقش لحد ما نوصل لحلول

فضفضة على ال you tube

ال you tube يا جماعة جامد اخر حاجة

عليه حاجات جامدة موووت

و علشان وائل عباس ما يزعلش

انا قصدي على الحاجات اللي فيه مش الموقع نفسه

ده طلع الناس عندنا بتفضفض عليه

على العموم انا قررت كل فترة كدة

اجبلكم فضفضة من عليه

و ادي كانت اول الحكاية

الانسان في مصر اصله كلب


طبعا كل الناس اتفرجت قبل كده على افلام امريكاني
لما حد بيحصله حاجة بيجي متصل ب 911 و تلاقي الاسعاف ولا المطافي ولا الشرطة موجودة في ثواني
وانا الحمدلله عمري ماتحطيت في موقف يطرني اني اتصل بالطوارئ في مصر
بس اللي حصل الاسبوع اللي فات خلاني اكلمهم
كنت مسافر طنطا و حصلت حادثة قدامي
فاتصلت ب 122 و ده رقم النجدة
بعد ما قعد يرن كتير الخط اتفتح
مافيش بقه حد رد عليه
دول حطوني على الانتظار و شغلولي مزيكا هادية
تخيلوا واحد مثلا تحت انقاض عمارة ولا واحدة مخطوفة ولا جريمة قتل بتحصل
والشخص اللي عايز نجدة ده يحطوه على الانتطار و يشغلولوا مزيكا
اصله متصل يطلب اكل ولا حاجة ساقعة
و كمان عند الوقت الكافي انه يستنى
متنهى المهزلة
المهم واحد رد عليا
فاقلتله لو سمحت فيه حادثة حصلت على كوبري بنها و فيه عربية مقلوبة
ام قالي اسمك ايه ... ؟ فا قلتله
كان رده عليا
انا مليش دعوة كلم الاسعاف و قفل السكة
انا ماستوعبتش اللي حصل
بس مافكرتش كتير
اتصلت ب 123 الاسعاف
حد ممكن يفهمني ليه كل حاجة في الطوارئ في مصر ليها رقم مش رقم واحد ليهم كلهم زي كل الدنيا
و اتحدى ان حد اصلا في الشارع عارف الارقام دي
المهم قام واحد رد عليا
قلتله لو سمحت فيه حادث حصلت و عايزين عربية اسعاف
قالي اسمك ايه ....؟ قلتله
قالي فين الحادثة؟ قلتله على طريق مصر اسكندرية الزراعي على كوبري بنها اللي فوق النيل
قالي فين ده
قلتله انت كلم بنها و هم هايعرفه
قالي ماينفعش لازم اعرف فين
قلتله ماهو ده طريق سريع و ده العنوان الوحيد فوق كوبري بنها
قالي ماليش دعوة كلم الجيزة و جه قافل السكة في وشي
سيبكم من كلمة ماليش دعوة اللي الاتنين قالوهالي و جايبة البلد ورا
ممكن اعرف اكلم الجيزة ليه و انا في بنها؟
طب اكلم مين في الجيزة؟؟؟
طب اكلمهم على رقم كام؟؟؟
فكرني بواحد صاحبي كان مسطول على طول
كان مثلا يكلمنا و يقولي
ايوة يا محمد .. انا مستنيك عند الصيدلية و يجي قافل
طب صيدلية ايه ولا الساعة كام
اهو اي كلام
ومن هذا الدرس ايها السادة نتعلم شئ واحد فقط

ان داروين لما قال ان الانسان اصله قرد كان غلطان

لان الانسان في مصر اصله كلب
ان الانسان و الكلاب حاجة واحدة في مصر
ليس له اهمية
يقتل كل يوم على الطريق زيه زي اي كلب
بلا اي اهتمام

منتهى الجمال من المسؤلين عن حياتنا في مصر


كلب زي اي كلب

عمرو غربية ده


الواد عمرو غربية ده وهمي يا جماعة

هو بيفضل ساكت كتير و فجاءة يشقلبلنا دماغنا

هو تصور خطاء بسيط في التاريخ لو كان حصل كان هايوصلنا لأيه

تغير بسيط في مجريات الاحداث كان هايخلي حياتنا إزاي دلوقتي

بجد يا عمرو

ارفع لك القبعة

قائمة الكلاب


نشر مركز النديم قائمة بأسامي مجرمي التعذيب و القتل في مصر
و كمان حوادث التعذيب و اماكن حدوثها
وصلتها لينا مدونة التعذيب في مصر
و نشرالقائمة دي عرباوي

اضغط على الصورة لتحميل القائمة

عرباوي مان


غادر بسلامة الله ارض الوطن

الزعيم المجاهد

حسام الحملاوي

الى بلاد المهجر في زيارة ستستمر ا5 شهور

و كانت هذه اخر صورة له قبل سفره

خمس سنين لكلب جديد

انتصار جديد لحق الناس في البلد دي
المرة دي من اسكندرية
خمس سنين لكلب جديد
مصدقتش لماسمعت الخبر في التلفزيون
و لقيت تفاصيله عند نوارة
أصدرت محكمة جنايات الإسكندرية (الدائرة الأولى) برئاسة المستشار محمد عزت شرباص، اليوم السبت 5/1/2008م، حكمًا في الدعوى رقم 1577 لسنة 2006 جنايات مينا البصل بالسجن خمس سنوات للرائد يسري عيسي (رئيس نقطة شرطة المتراس) وعزله من الوظيفة وتغريمه 500 جنيه، وكذلك حبس كلٍّ من الجنديَّين محروس مرضي عبد السلام وصبحي أحمد عامر بالسجن لمدة سنة؛ بسبب قيامهما بالقبض على المواطن إبراهيم عبد النبي عباس سالم، بتاريخ 27/4/2006م، واحتجازه وتعذيبه بديوان نقطة شرطة المتراس في غير الأحوال التي تصرح فيها القوانين.ولم يكتفِ المتهمون بذلك، بل قام المتهم الأول يسري أحمد عيسى بهتك عرض المجني عليه بالقوة بأن جرَّدوه من ملابسه عنوةً، وقاموا بهتك عرضه، ثم أجبروه على ارتداء لباس نوم حريمي!! واقتادوه إلى الطريق العام على مرأى من المارَّة وهم يعتدون عليه بالضرب فأخلوا- بذلك- بشرفه.وبعد ارتكاب الضابط جريمته الشنعاء قام بتزوير المحاضر أرقام (6 و7) أحوال والمحضر 3455 لسنة 2006 إداري مينا البصل؛ حيث أثبت ضبطه للمجني عليه إبراهيم عبد النبي محرزًا بمطواة، وأثبت المحضر الثاني ضبطه للمجني عليه حال كونه لا يحمل تحقيق شخصية وأُثبت بالمحضر الثالث مشادة بين المجني عليه والمدعو جمعة محمد إبراهيم وتصالحهما، وذلك على خلاف الحقيقة.وفي أول تعليق له عقب صدور الحكم قال إبراهيم سالم: "أنا شعرت أن كرامتي رجعت لي، وإن فيه حق في البلد، وبقيت بني آدم من جديد، والحكم ده رد لحقي، وأنا فرحان إن واحد زي المتهم يسري مش حيقدر يمارس تعذيب على الناس مرة تانية".واستقبل أهالي المجني عليه الحكم بالزغاريد والأحضان وتوزيع الشربات والهتاف، قائلاً: "يحيا العدل"، "جاء الحق وزهق الباطل
شفته شخص مريض نفسيا زي الراجل ده قبل كده - ماتقلش راجل بس على رأي عم احمد
المهم ان كلب و خد جزاته
شفته بقه لما الناس بدأت تتكلم بدأت حقوقها ترجع ازاي
هافضل طول حياتي اقول و انادي ان الناس تتكلم
لأن السكات هو اللي جايبنا ورا