خيارة البطاطس في الكوسة

موضوع صحيان الصبح كل يوم و بعد كده اول ما اروح الشغل افتح الفيسبوك بقى مرض
كل يوم اول حاجة اعملها بعد فتح ميلات الشغل اني ادخل على كتاب الوش ده
صحيح هو بقى وسيلة الاخبار رقم واحد حاليا متفوقا على كل الاعلام الفاكس اللي احنا عايشين فيه
بس برضه بقى كل يوم بيائسني في حياتي زيادة
لأن كمية المعلومات اللي بقت بتوصل عن طريقه كل ثانية كتير قوي
اذا كانت مقالات او كانت اخبار او فيديوهات
عن حال البلد الجميلة اللي احنا عايشين فيها دي
وازاي انها جنة الديموقراطية في المنطقة
وازاي انها فاكهة العدالة في العالم
وازاي انها مانجة الحريات في الحتة
و موزة الابداع في الحارة
و خيارة البطاطس في الكوسة
اي كلام
بس اذا كانت الاخبار دي بتيئسني من حياتي و قرفاني
الا انها بتديني اقتناع كامل بأن اللي بعمله او بنعمله ده صح
و ان الشعب ده ما بيتعلمش
و مابيقدرش
و مابيفهمش
و مالوش فيها
شعب نكدي و غبي
قارف الباشا الكبير في عيشته
و مخليه يصحى كل يوم من النجمة علشان يدوب يصلي الفجر
و يلحق يشوف الناس المقرفة دي عاوزه ايه
بيحاول بكل جهده انه يلبى احتياجات محدودي الفهم منا
و بيقضي يومه على حتة جبنة و رغيف عيش
حاسس بينا و بمشاكلنا و بنوعية اكلنا
بس احنا مانستهلش كل ده
حبت رعاع عاملينله معارضة في البلد
و اعتصامات و مظاهرات
كلاب .. عملاء .. خونة
بيحولوا يهزوا وسط قصدي استقرار مصر
في عهد لم نرى منه الا كل امن و امان
و قد عبر بنا الى ساحة العدالة و الحريات لم نرها طوال 22 الف سنة
و كل ده و مش عاجبنا
فانداء الى قائد عبورنا و حبيب قلوبنا
سر فاكلنا معك
ماشين وراك مش خايفين
عارفين ان فيه ربنا عظيم
..............................................
دي مقالة ليا كنت ممكن انشرها لو شغال في صحيف قومية