بقالنا 3 سنين بنتسمم

video

من شهرين كده تم اكتشاف ان فيه شحنة قمح فاسدة دخلت البلد
و الاعلام و الحكومة قامت ولسه ماقعدتش عشان تحارب الفساد ده
و تم ارجاع القمح الفاسد الى مصدره
قوووووم ايه تيجيلي العصفورة معاها سي دي عليه تسجيل صوتي
لرئيس مجلس ادارة مطاحن مصر العليا في اسوان
في اجتماع ليه مع العمال
بيقر فيه انهم بقالهم 3 سنين بيستعملوا قمح اوكراني فاسد
و انه يا عيني عليه عارف ان الغلة دي مضرة و بتجيب امراض
بس مش هو اللي جايبها , دي وزارة التموين , يبقى هو هايتكلم ازاي معاهم؟
و المشكلة انه بيتكلم عن الموضوع بمنتهى البساطة و ان مافيش حاجة في ايديه يعملها
المصيبة التانية بقه ان اعضاء نقابة العمال دول هناك اغلبهم من قرايب السيد رئيس مجلس الادارة
و العمال دول المفروض ليهم حصة تموينية من دقيق المصنع بتاعهم
و هي 4 اشولة لكل عامل متزوج و عنده اطفال
و تقريبا شوالين لكل عازب
و الناس دي ايها السادة المستمعين
بتاخد بس شوال واحد
و 3 اشولة الباقين بيتباعوا لحساب السادة اعضاء مجلس النقابة في السوق السودة
و نيجي للي بعده
من 1/4/1996 العمال دي مش بتاخد البدالات بتاعتها و هي :
1- بدلات طبيعة العمل
2- بدل نقدي
3- بدل عدوى
4
- بدل ورادي
زائد انهم ما بيصرفوش إلا 15 % من ساعات العمل الاضافي مع انهم بيشتغلوا في الاجازات و الاعياد و ايام الجمعة و العطلات الرسمية
و البدلات دي كلها بتنضاف على ارباح الشركة
الشركة اللي في مصيبتها الرابعة قللت حوافز العمال بصورة كبيرة
و اعطت و لأول مرة في العالم للعاملين الاداريين في المصانع حوافز اكبر من العمال
مع ان العمال في كل حتة في العالم بياخدوا اكتر من الاعمال الادارية لإنهم هم اللي بيعملوا كل الشغل بإديهم
بس ازاي عندنا هنا حاجة تانية
الاعمال الادارية تاخد حوافز اكتر من العمال من ارباح الشركة اللى اصلا زادت علشان العمال لا بتاخد بدلات ولا حوافز
كله ده علشان سبب واحد بس
خمن معايا كده !!! تخمينك صح
اصل نص العاملين في الاعمال الادارية من قرايب السيد رئيس مجلس الادارة بالمالخالفة لكل القوانين و الاعراف
علشان كده ارباح 2008 وصلت 39,201,654 بدل من 37.430.164 في 2007 علشان الحبايب يتهنوا
لأن كل م الارباح زادت الحوافز بتزيد
الحوافز اللي بتروح للأداريين بس بدل من العمال اللي عملوها
و بعديها يجي السيد رئيس مجلس الادارة يقولك في الجرايد ان متوسط مرتب العاملين عنده 15000 في السنة زي ما
قال في جريدة الجمهورية.
مع ان فيه شهادات مفردات مرتب معانا بتقول ان المتوسط تقريبا 5000 جنيه في السنة و ان الشهادات دي متسجل فيها انهم مش بياخدوا لا حوافز ولا بدلات و لا حتى كوباية شاي.
يا جماعة الناس دي بتصرخ من بعيد و احنا مش سامعين
الناس عايزة تقولنا انا بناكل اكل مسمم بقالنا 3 سنين بعلم وزارة التموين
الناس دي عايزة تقولنا انها بقالها 13 سنة بيتسرق تعبها
الحقوا الناس دي او حتى الحقوا نفسكم
***************************
دي لنكات التغطيات الفقيرة للموضوع مفيش حد فيهم جاب سيرة القمح الفاسد
بس دلوقتي يه تسجيل صوتي هاتسمعوه
اللهجة صعبة شوية بس لو ركزتوا هاتفهموا
هم بيسموا القمح (الغلة) و الفلاحين زيي هايفهموا
http://www.youm7.com/News.asp?NewsID=106676
http://www.ikhwanonline.com/Article.asp?ArtID=49663&SecID=0
http://www.youm7.com/News.asp?NewsID=94041
http://www.e-socialists.net/node/3554