التوربيني .... عودة أخطر رجل في العالم

كلنا نعرف ان ساعات و ان ماكنش غالبا بعض ضباط الشرطة لما السنة بتاعتهم بتخلص و لسه في قواضي مخلصتش بيجوا لامين أي حد من الشارع و غالبا أصحاب السوابق.. كل واحد في منطقته .. و يلبسوهم التهم دي بدل ما يتعبوا نفسهم و يشتغلوا لحد ما يوصلوا للمجرمين الحقيقيين
و اللي بيحصل انهم بيسيبوا غلطة في المحضرعلشان العالم دي تطلع براءة ( قال عندهم ضمير ) و الموضوع يتكرر كل سنة ... زي من إسبوعين لما شفت ضابط عامل كمين الساعة 1 الظهر جنب حي الدقي بيلم فيه أي تباع عربية الأجرة بتاعته ماشية في الشارع و بعد كدة يوديهم القسم و يكشف على اساميهم و و يشوف بقة لو عليهم قواضي ولا لأ؟؟
يعني منتهى المهزلة .. و عدم مراعاة حقوق المواطنين ..يعني يقبض عليك و بعد كدة يشوف انت مجرم ولا لأ؟؟
يعني مستخسر يشوف شغله و يدور على المجرمين فا بينزل يلم الناس و بعد كدة البرئ يخرج من الحبس بعد كام يوم بعد ما يتحول للقسم التابع له ..... زي ما حصل لأيوب

المهم إمبارح كنت بقراء في موفع فالبلد ان (التوربيني) أعترف ان هو اللي شال الجزرة بتاعت القطار في حادثة كفر الدوار اللي مات فيه 170 مصري غلبان
و انه المسؤل عن إغتصاب و قتل 40 طفل مصري اخرين
و أنه ابلغ عن عصابة شخص أسمه (غرغرينا ) في الأسكندرية عنده 75 طفل بيغتصبهم و يقتلهم بعد ما يشغلهم في الشوارع.
و انه و انه و أنه..................!!!!!!!!! كل حاجة
أيه يعني .. هو مين؟؟؟ مستر أكس ؟؟؟؟ كل جرايم البلد هو اللي عاملها؟؟؟؟
و ياحكومة ... و البلاوي دي كلها بتحصل ..انت فين بعد ما اتقتل 40 طفل مصري يا ناس؟؟؟
أنا مش فاهم...... حد يشرحلي
كل ده عمله لوحده هو و اتنين معاه ....و الحكومة ما تعرفش إلا بعد ما هو إعترف؟؟
يعني المفروض ان فيه 40 تحقيق مفتوح بين إختفاء و قتل أطفال و كلهم بطرق متشابهة و الحكومة معرفتش مين اللي عملها؟؟؟
و فجاءة يجيبولنا واحد يلبسوه كل دة مرة واحدة ... بكره هانلاقيه هو المسؤل عن النكسة و عن تفجيرات شرم الشيخ و أي مصيبة الحكومة فاشلة فيها

كنت فين يا حكومة و كل دة بيحصل في البلد؟؟؟؟
طب خبوا الموضوع بدل ما انتوا فاضحين نفسكوا قدام العالم كله
.........ولا خلاص مابقاش فيه

سلام