سيمور هيرش في القاهرة

حضرت إمبارح مع عرباوي ندوة في الجامعة الامريكية ل سيمور هيرش الصحفي الامريكي الكبير اللي كشف موضوع سجن ابوغريب
و أحداث كبيرة تانية منها مذبحة امريكية في فيتنام ..... و كان سيمور في مصر بدعوة من مؤسسة هيكل و كان هيكل نفسه حاضر
المهم ان الراجل اتكلم عن حاجات كتير منها سياسات امريكا الخاطئة في الشرق الاوسط و مع العالم و خصوصا اتكلم عن العراق و ايران و لبنان و حزب الله و اتكلم بالذات عن حسن نصرالله و اللي قاله في اخر لقاء بينهم ان هدف الامريكي من الدعم اللا محدود لأسرائيل في الحرب الاخيرة هو عمل فتنة علشان لبنان تاكل نفسها بنفسها و يخلصوا من حزب الله اللي هو التهديد الحقيقي الوحيد لأسرائيل في المنطقة
و اتكلم عن ايران و ازاي انه مش فاهم ازاي امريكا عايزاها توقف نشاطها النووي قبل المفاوضات يعني بتفرض نتيجة المفاوضات قبل ما تتفاوض اصلا ...... و ده كلام اهبل
الحاجة اللي خنقتنا فعلا و ضحكتنا في نفس الوقت هي لما هيكل بداء كلام قال انه اول ما دعى سيمور للقاهرة ماكانوش ناوين يعملوها في الجامعة الامريكية و لنا طلبوا يعملوها في مكان مصري مش فاكر كان ايه رفضوا لدواعي امنية و هو عرف ان السبب الرئيسي ان سيمور يهودي ... و قال ازاي و المكان ده كان استضاق بيجن وقادة اسرائيلين قبل كده؟؟ إشمعنا يعني
انا اصلا مش فاهم موضوع الدواعي الامنية ده؟؟ كل ما نيجي نعمل حاجة يقلولنا ماينفعش لدواعي امني .... مثلا ينقلولنا الماتشات من ستاد لستاد علشان دواعي امنية .... و مثلا واحد عسكري شرطة عسكرية من اللي بيقفوا في كشك في الشارع يكتبلك عليه ممنوع الاقتراب و التصوير لدواعي امنية
والنبي بلا خيبة
اكبروا بقه وافهموا ان الدنيا اتغيرت و ان لو فيه طفل قاعد على النت في بيتوا ممكن يشوف بيت الريس بجوجل ايرث مثلا
اقول ايه يعني ..... فكروا يا هبل و بلاش غباء بقه
the photo and details in English at ARABAWY'S