عالم وسخة

بعد الحركة اللي عملوها فينا للمرة التالتة

لا تعليق

ولاد المحلة


احلى حاجة عجبتني في موضوع اضراب عمال غزل المحلة

غير طبعا انهم في اضراب اصلا

و ان انا اصلا مولود في المحلة

خبر قريته ان معظم العاملات المعتصمات

بقوا بياخدوا ولادهم الصغيريين معاهم في الاعتصام

مش قادر اقولكم الخبر ده فرحني قد ايه

واللي فرحني حاجتين

الاولى : تفكير الامهات دي انهم لازم ولادهم يعرفوا ياخدوا حقوقهم إزاي

التانية: ان الولاد الصغيرة دي كده هاتتربى انهم إزاي يتكلموا ويطالبوا بحقهم

هي دي التربية اللي ناقصة عند ولادنا

انهم مايسكتوش

انهم يتكلموا

انهم مايخافوش

انهم لازم ياخدوا حقهم

علشان القرف اللي احنا فيه دلوقتي بسبب ان الناس ماتربتشي على كده

ماتربتشي انها لازم تتكلم و ياخدوا حقهم ولو على رقبتهم

انهم طول ما هما ساكتين

حقهم عمره ما هايرجع

هايفضل طول عمرهم متاخد منهم

.....................

مثلين بأمن بيهم

ما ضاع حق وراءه مطالب

يا فرعون ايه فرعنك . قال مالقتشي حد يلمني

...............

تفاصيل غزل المحلة

شكرا ل يساري على الصورة

انتوا ليه اغبيه كده

الامارات الغت عقوبة حبس الصحفيين
واحنا لسة حابسين اربع صحفيين
طب اقول ايه للناس اللي عندنا دي
احه؟؟
هو الناس كلها بتتقدم
واحنا لآ
هو انتوا ليه اغبيه كده

القاهرة في رمضان

بقالي فترة ماشوفتش فيديو ضحكني
و بيتكلم عن خيبيتنا اللي موجود في كل حاجة
حاجة احنا مختلفين عن العالم كله فيها
المرور
من العن الحاجات في مصر
حاجة بجد ماشوفتهاش في اي دولة
المهم
اتفرجوا واضحكوا شوية


كلاكيت 35 مرة

كلاكيت 35 مرة
اظن الماتش امتع الجمهورين النهاردة
الاهلي طمن جماهيره انه لسه البطل
و الزمالك طمن جماهيره انه في الطريق الصحيح
كرول عمل كل اللي يقدر عليه
بس خبرة لعيبته في الماتش ده لسه قليلة
و ده اللي استغله جوزيه
اللي انا شايفه انه رجل المباراة
وانه عرف يسيطر على الماتش
الاهلي لعب ماتش صعب عليه قوي و في ظروف وحشة
الزمالك لعب ماتش جديد على لعيبته بس كانوا كويسين
الاهلي انتصر بدماغ جوزيه و روح لعيبته اللي هما اصلان ميتين
الزمالك كان ممكن يكسب لو لعيبته قدرت تسيطر على توترها
مبروك للفرقيتين انهم لعبوا ماتش بالمستوى ده في ظروفهم دي
و ياريت يا جيمي ماتجيش تقولي الحكم و الحظ و الظلم و الكلام ده
اتغلبتم فيها ايه ده العادي
و كسبنا فيها ايه؟ ماهو ده العادي برضه
انا اعترفت انكم كويسين
اعترف مرة في حياتك اننا نستحق

واخبطوا دماغكم في الحيطة

أعتقد أن هذا هو أفضل توقيت لفضح سياسات الحزب الوطني.. وتجريسه وشرشحته في الداخل والخارج
قبل عقد مؤتمره السنوي المقبل.. فهذا الحزب منح كل محام عضواً به..
توكيلاً لحبس الصحفيين والمواطنين علي حد سواء
لكل من يعترض علي سياسات الحزب أو ينتقد رموزه
هل هناك فرصة أفضل من ذلك؟ ولا مشكلة في أن يرتفع عدد الصحفيين من أربعة إلي عشرة
ثم من عشرة إلي عشرين
ده كان كلام مجدي مهنا النهاردة في المصري اليوم
انا شايف انه عنده حق
الكيان ده لازم نفضحه قدام العالم كه قبل المؤتمر السنوي بتاعه
و صدقوني ان لسه ناس في مصر حسباه انه كويس و بيعمل اللي عليه علشان البلد
بس ياعيني ظروف البلد وحشة, واحنا عددنا كتير
فاوالنبي الحزب هايعمل ايه اكتر من كده
ماهي البلد مفشوخة حرية و اللي عايز يعمل ولا يقول حاجة بيعملها
دول غلابة و طالع مايتنهم في الشغل كل يوم
عايزين يعملولنا كل حاجة
بس العين بصيرة و الايد قصيرة
و تلاقي ناس كتيرة قوي لسه بتدعي للريس و للحكومة
اللي مخالينا احسن ناس في الدنيا
ماهو ماحدش فيهم سافر برة و عرف ان احنا حتى اقل دولة عربية
المهم
ان الناس دي اللي ميدية لنفسها حق العيب في الذات الالهية
و ادت لنفسها الحق انها تحبس اي واحد فينا يتكلم عنهم
لازم يعرفوا اننا هانفضل نتكلم عنهم و نفضحهم و مش هانسكت
و خليهم يرفعوا علينا قواضي و يحبسونا
هانتكتب من السجن
ولا يقفلولنا مداونتنا
هانفتح غيرها
عادي
واخبطوا دماغكم في الحيطة

كل سنة و انتم طيبين

كل سنة و العالم كله بخير
و كل الناس كويسين
و محترمين
و مؤدبين
و نضاف
و مش مرتشين
و الظباط محترمين
و مش قتالين قتلة ولا معذبين
واللي منه لله يسبنا و يمشي و هانكون مستريحين
اللهم إننا قد صبرنا ربع قرن
فإعفوا عنا
واغفر لنا
وارحمنا
انت مولانا فانصرنا على القوم اللي لابدين
واجعله شهر كريم او سيد او حسن
بس وحياة حبيبك النبي بلاش مبارك يا رب العالمين
امين,,امين,,امين

الكتاكيت


الايميل ده جالي من صديقة قديمة
لقيت انكم لازم تقروه

اللى هيحل الفزورة مايقوليش حلها و يخليها فى سره
استدعى الاب ابنه لغرفته و ما إن رأه امامه الا وبادر بتوجيه
هذا السؤال
الاب : هتعرف يابنى تحافظ على الثروه اللى هتورثها من بعدى
الابن : طبعا يا ابا تربيتك
الاب : يعنى هتعرف تربى الكتاكيت زى ما انا ربيتهم
الابن : ( باندفاع وحماسه الشباب ) اكيد يا ابا
الاب : طيب هات الكرتونه اللى فيها الكتاكيت دى
سارع الابن باحضار الكرتونه ووقف امام ابيه
الاب : اقلب الكرتونه على الارض وورينى ازاى هتقدر تلم فيها
الكتاكيت وبسرعه قلب الابن الكرتونه وما ان رفعها حتى انطلقت الكتاكيت
فى ارجاء الغرفه واندفع الابن خلفها يحاول جمعها مره اخرى لكن
هيهات ، وبعد ان ادرك الفشل وقف امام ابيه وقد ارتسمت على
وجهه البلاهه والغباء ولم يوقظه الا صفعه قويه من ابيه
الاب : شوف يا غبى اللى هاوريهولك ده خلاصه 26 سنه فى تربيه
(الكتاكيت (يعنى من سنه 1981
ثم اخذ الاب الكرتونه بعد ان جمعا فيها الكتاكيت اخذ يهزها بقوه
يمينا ويسارا وسط صراخ متواصل من الكتاكيت ما لبس ان تلاشى
وانقطع نتيجه ما اصابها من اعياء
الاب : الان فقط نقلب الكرتونه
وما ان رفعها الا وشاهد الابن الكتاكيت لا تحرك ساكنا مما
اصابها من اعياء ودوار ثم قام بتعبئتها فى الكرتونه بمنتهى
السهوله واليسر
الاب : دلوقتى يا ابنى اتعلمت اهم حاجه فى تربيه الكتاكيت وهى
( اتعبهم يريحوك, انفخهم يريحوك اكتر لكن لو ريحتهم هيتعبوك )
لو عرفت مين هو الاب ومين هو الابن ومين هما الكتاكيت ؟

ادخل عشتك وخليها فى سرك

الناس

مع الايام
بنعرف ناس
بنقرب من ناس
وبنحاول نفهم الناس
وساعات بننجح اننا نفهمهم
و ساعات لأ
وكتير بنفرح لما نحس بالناس
وكتير بنزعل لما الناس ماتحسش بينا
علشان كده طول الوقت بنحاول نحب الناس
ونحس بالناس
علشان نفسنا يحبونا
ويحسونا
بس الاغلب
لا الحب
ولا الاحساس
هو اللي بناخدوا منهم
نادرا ما بقينا نلاقي حد يحبنا و خلاص
او يحس بينا و خلاص
نادرا ما بقينا نلاقي اللي بيعاملنا زي الناس
مع اننا بنعمل كده مع كل الناس
و النتيجة ايه؟
كل يوم بنبعد عن الناس
و بنخسر الناس
لأن الناس
مابقتش نفس الناس
ونرجع نلاقي نفسنا
مع الايام
بنعرف ناس
وبنقرب من ناس
وبنحاول نفهم الناس