دماغ ماك ... زي ما انا عايز: مطار القاهرة

دي حاجة انا نسيت اعملها
اللي حصل ان و احنا مستنيين في النقطة البشوات ياخدوا اذن يعملولنا محضر اثبات حالة
وائل اتصل بالنجدة علشان يبلغهم ان النقطة مش عايزة تعملنا محضر
بعد ما طلبنا نعمل المحضر بساعة كاملة
و طبعا بعد المزيكا الظريفة ردوا عليه و بعد كده حلقوا و ماجوش
ده زائد ان دي ماكنتشي اول مرة يكلمهم
دي كانت المرة الرابعة اليوم ده
علشان كده قلتله نسجل المكالمة دي كمان
وادي التسجيل اهوه
بتاريخ 30 يونيه 2009
الساعة 5:32 مساءا
يعني بعد ساعة من دخولنا النقطة

عقبال ما اللول يكتب عن اللي حصله في المطار
هاحكيلكوم على الجزئ الاخير في اليوم اللي ممكن يكون اللول مسقط فيه
و كان بيتكلم بقوة دفع العصير اللي جبتهوله و محاسبنيش عليه (منك لله ..مادنتيش شفطة حتى) هيهيه
و هو جزء لما رحنا النقطة بتاعة المطار علشان نعمل محضر اثبات حالة للي حصل في المطار
طبعا بعد ما (حاظابط)سمع اللي حصل لوائل قالنا ثواني و قام يرغي في التليفونات
و يبلغ الباشا ده و الباشا داكهوت
قام ايه قالنا احنا مستنيين الباشا بش يجي علشان نعمل محضر
و قعد يضيع في الكلام و يهزر واحنا كانت روحنا في مناخينا بعد اليوم الطويل ده
كنا صحيح انا و مروة المحامية في الشبكة العربية و رباب المحامية من مكتب د\ايمن نور و شاهيناز عبد السلام
و وليد اخو وائل الموجودين
و كان معانا كمان قبليها شريف عازر من المنظمة المصرية و سارة كار من الدايلي نيوز
المهم الباشا جه و هو سيادة اللواء اسماعيل زي ما عرفنا بنفسه
و هو شخصية ظريفة قعد يرغي كتير برضه
و قال ايه عامل نفسه بيمر بس قام لقانا قاعدين فجه يشوف فيه ايه
المهم قعد يفسرلنا كل اللي حصل لوائل على انه تصرفات عادية و يحاول يقنع وائل انه مايعملش محضر
بس كلنا صممنا ان المحضر يتكتب
و اول ما بداء المحضر كان بيحاول هو و الظابط يملوا الامين يكتب ايه و ده اللي اعترضنا عليه في تدخل اي حد فيهم و خليناه يكتب محضر جديد
لما وائل كان بيمليه اللي حصله قام سيادة اللواء اعترض على كلمة احتجازه بالمطار و قال انه ماكنشي احتجاز
و ضيعلنا يجي نص ساعة يشرحلنا ازاي انه مش احتجاز
بس برضه صممنا اننا نكتب الكلمة دي
عملنا محضر على مزاجنا زي الفل
والاحسن كمان ان العصفورة صورت كل ده علشان المحضر مايتقطعشي و يقولوا مافيش حاجة اتعملت
وادي الصور