الشبكة مش قادرة خلااااص




ضحكني قوي موضوع قطع الكهربا اللي حصل في مصر الصيف ده
خصوصا ان الكهربا كانت دايما من اهم انجازات الملك الآله في ال 29 سنة اللي فاتوا
و لسه فاكر اعلانات كانت ملزوقة في الشوارع ان مابقاش فيه قرية في مصر من غير كهربا
الاعلانات دي كانت من يجي 10 سنين كده.
و دايما تلاقي الملك الأب الآله بيفتتح محطات الكهربا هنا و هناك و محطات بخارية و مازوتية و سولارية و انواع غريبة من الطاقة كده عفا عليها الزمن.
قوم ايه بعد ده كله يقولك الشبكة مش قادرة تستحمل واحنا هانقطع الكهربا عن حبة احياء كل يوم علشان الشبكة تقدر تشيل
ده على اساس ان فجاءة الصيف ده كل المصريين اشتروا تكيفات و كل واحد ماشي في الشارع مع تكيفه
و حتى لو ده صحيح و كل المصريين ركبوا تكيفات و كلهم مشغلينها في نفس الوقت فا مش من المطلوب منهم انهم يتحملوا فشل الحكومة في توفير متطلباتهم من الكهربا و خصوصا انها مش مجانية و الشعب بيدفع تكلفتها.
و مش عايز اقارن بينا و بين دول الخليج اللي كل مبانيها و دكاكاكينها و كل خرم فيها مكيف طول الوقت طوال العام بلا انقطاع وامبيحصلشي ان الكهربا بتقطع.
بصراحة كل ده مش مهم بالنسبالي.
النقطة المهمة في رأيي هو كيفية ادارة الازمة اللي واجهتها الحكومة المصرية و ايه الحلول اللي وجدتها الحكومة و الاحتياطات اللي اخدتها علشان ده مايتكررشي بعد كده.
الحل اللي وجدته الحكومة المصرية لمواجهة خطر انهيار شبكة الكهرباء هي قطع الكهربا غصبا عن الناس.
و هو حل من وجهة نظري في منتهى الغباء. بس الحكومة راهنت فيه على انها بتحكم شعب اخرس و ماحدش هايفتح بقه و هي كسبت الرهان.
لأن الحل ده لو اتعمل في اي دولة تانية شعبها مش اخرس كانوا وقعوا الحكومة الفاشلة و الناس رفعوا قضايا تعويضات بالملاين على الحكومة و طالبوها بتعويض عن الاضرار اللي حصلت لهم.
بس الشعب المصري الحمد الله هايل و مقدر زنقة الحكومة.
بعيدا برضه عن ده كله في نفس الوقت من شهرين في سان فرانسيسكو واحد موظف حكومي خبط على حمايا في البيت و قاله مساء الفل ممكن ادخل مطبخكم واعرف نوع التلاجة فقاله اتفضل و لما دخل ولقاها قديمة تاني يوم الحكومة جابتله تلاجة جديدة.
و السبب هو الاتي:
الحكومة الامريكية تواجه مشكلة ضخمة و هي نقص امدادات الطاقة و خصوصا مع ارتفاع اسعارها عالميا و علشان كده قررت انها تحط برامج لخفض معدلات استهلاك الطاقة بين الشعب الامريكي زي مثلا التلاجة الجديدة بدل التلاجة القديمة اللي بتستهلك طاقة اكتر.و زي مثلا انها بتدعم بعض المنازل القديمة ب 1500 دولار علشان يغيروا شبابيكهم علشان تحفظ التدفئة او التبريد اكتر جوة بيوتهم و مايضيعوش طاقة مستهلكة اكتر من اللازم.
ده زائد التركيز و دعم بناء المنازل (الخضراء) اللي هي صديقة للبيئة و دعم المواطنين اللي بيتحولوا لأستخدام الطاقة الشمسية في منازلهم بتخفيضات في الضرائب .
تمن التلاجة و الشباك دول اللي دفعتهم الحكومة الامريكية هايوفرلهم مليارات من فلوس الطاقة اللي بيدفعوها سنويا و هايخفضوا في سعرها في نفس الوقت.
زائد ان اهم الحاجات اللي بتشتغل عليها الحكومة الامريكية و داعماها بفلوس خرافية هي اكتشاف مصادر متجددة للطاقة و غير مكلفة زي الطاقة الشمسية و الرياح و المياه و حجات تانية غريبة لا و مش هانسمع عنها.
و مافكرتش في يوم انها تقطع الكهربا (قصد) عن حي بروكلن في نيويورك مثلا لأن ده لو حصل كانت هاتتغير كلها تاني يوم.
ده الفرق بين حكومة شغالة لبلدها و شعبها و حكومة شغالة لرضا ابوها الملك الاله و مش هاممها شعبها لأنه كده كده مش هو اللي جايبها ولا هو اللي هايمشيها.
و ده الفرق بين شعب هو اللي حاكم حكومته و بيجبها و بيمشيها حسب ما هو شايف هي شغالة لمصلحته ولا لأ و شعب مالوش دعوة و قاعد مقضيها و بيشتكي همه لربنا على الفيس بوك.
هافضل ازن في المشكلة الرئيسية اللي خاوتة دماغي.
يا فرعون أيه فرعنك ؟؟ قال مالقتشي حد يلمني.