guess whos back

عايز في البداية اعلن خبر حلو قوي
ممكن اللي معاه رقمي وصلوا الخبر بالرسايل
في اسعد ايام حياتي استقلت من شغلي خلاااااااااااااص
بعد ما قضيت اتعس سنة في حياتي المهنية
في شركة كرهتني الحياة
كنت بشتغل زي العبيد لدرجة ان شغلي كان بياخد من يومي 15 ساعة كل يوم
زائد ان الكوسة في الشركة دي كانت الله ينور
مافيش اكتر من كده
وانا كنت جبت اخري خلاص
الحمدلله تاني اني خلعت
والتحيا فودافون
.........................................
انا حاليا واخد اجازة من كل حاجة
وبحاول ارجع ايام زمان
لما كنت بكون كل يوم في حتة جديدة
ييااااااااااااه...... الحياة دي كانت وحشاني قوي
بدأت اشوف اصحابي تاني
واعمل حاجاتي الخاصة بيا
وهارجع اكتب تاني
حالتي النفسية طبعا بقت في العلالي
اللي شفني قبل ما اسيب الشغل كان هايشوف اطول دقن ربيتها في حياتي
يوم ما استقلت روحت حلقت و لفيت على كل الناس يقولولي كفارة
مهما عديت في فوائد تركي الشركة اللي انا كنت فيها مش هاقولها كلها
الحمدلله على اي حال
ويا جدعان يا ريت محدش يكتبلي بقه في الكومنتس
ان الحياة مش لعب و هزار و بس لازم العمل و الاجتهاد و الكلام ده
يا سيدي انا عارف و هاروح على شغل تاني قريب
بس لما ارتاح شوية من اللي انا كنت فيه
و ارجع نفس الشخص بتاع زمان
وادعولي المرة دي اني احب مكان شغلي وان ربنا يوفقني فيه
علشان اخلص واتجوز البنية اللي مشحططها معايا دي
و كمان ادعولي ان اختي اللي زعلانة مني ماتزعلشي
اصل انا عندي اختين
واحدة زعلانة مني وفضحاني على البلوج بتاعها
ووحدة مجنونة و هربانة منها بس عايشة قصة حب جميلة اتمنى انها تكمل
maaaaaaaaaaaaaaaaaaaaaaaaaaaaaan
انا فرحان قوي اني رجعت
guess whos back
back again
MAK is back
tel ur friends
guess whos back
guess whos back
guess whos back
guess whos back
guess whos back
guess whos back

حبيبة الماااالاااايين

فاكرين الاغنية بتاعت

الوداع يا جمااااااال..... يا حبيب الماااالايين

اللي غنوها لجمال عبد الناصر لما مات

مفاجأة سارة لجميع المصريين

ما زال النفاق مستمرا و بقوة

لذا فنحن نعلن من بلوجنا هذا

و رأسنا مرفوعة عاليا

حبا و فداء للوطن

وشكرا لله علىنظامنا الملائكي

ان محبوبة الملايين الجديدة هي

دندندندااااااااا (موسيقى تصويرية) داندانداندااااا

ماااااااااااااامااااااااا

سوزاااااااااااااااااااان

هييييييييييييييييييييييييييييييييييييييييه

و تحيا مصر ياعم

مش مهم

بقالي كتير ماكتبتش حاجة

كنت مشغول قوي في شغلي ( الزفت ) و حياتي اللي مابقتشي فاهم فيها أي حاجة

حصلي مييت موقف كنت عايز اكتب عنهبس مفيش نت في البيت

زائد ان معنديش وقت اكتب الا و انا نايم

بس انا عايز اتكلم عن حاجة خنقتني و انا مروح من كام يوم

كنت في الباص بتاع الشغل و قاعد جنب السواق

فاشغلت الراديو على اغاني

و فجاءة طاع صوت من ورايا واحد اعرفه بيقول : اقفل الزفت ده انا مابسمعش اغاني

فابصتله و قلتله : ماشي يا **** بس نوطيه بلاش نقفله

قال لي : لأ اقفله

انا : لو انت مابتسمعهاش في غيرك بيسمعها

هو : مش مهم

انا : يعني ايه مش مهم

هو : يعني مش مهم

السواق : صلوا على النبي يا جماعة ,, اهو يا باشا قدينا قفلناه

ده اللي حصل مع شخص اقل كلمة اقولها عليه انه متخلف

لما تغصب كل اللي حواليك على رأي خاص بيك ده اسمه تخلف

و كمان فيه طريق الطف من كدة لما تيجي تعمل حاجة زي دي

مش تيجي تقولي مش مهم رأي الناس كلها و انا سبع البرمبة اللي رأي هو اللي صح

نفس برضه اللي بيجي يركب أي مواصلة و يجي مخلي السواق يقفل أي حاجة مشغلها و يجبره انه يشغل قرأن

طب افرض السواق مثلا مش مسلم

او الركاب مش مسلمين

بتجبرهم ليه يسمعوا حاجة خاصة بيك انت و بينك و بين ربك

اصل الدين مش عافية و مش باللي بيفرض نفسه على غيره

ده بالعكس

أي حد فينا بتنفرض حاجة عليه بيكرهها

انا مش ضد ان الناس كلها تشغل قرأن بس هو الدين مش انك تسمع قرأن طول الوقت

و انت اخلاقك و طريقة حياتك و كلامك مع الناس اوسخ من الزبالة

على أي حال

انا ماسكتش بعد ما السواق قفل الراديو

نفضت للشخص ده و جيت مشغل موبايلي الميوزيك إديشن على طول

و جيت معليه على الاخر

و شغلت لنكن بارك كمان

يعني عملت احلى اقلق

و خليته هو بقى يحس انه مجبر على حاجة

وانه هو اللي مش مهم رأيه

مش كل الناس

He's Back


7amalawy is back