نفسي افهم حاجة...هو احنا حيوانات؟؟



.نفسي افهم حاجة...هو احنا حيوانات؟؟


يعني انا بجد مابقتش فاهم...هما بيتاعملوا معانا كدة ليه؟؟؟


ليه بقت حياتنا كلها امن مركزي....و لازم نضرب حتى لوهنعمل حاجة للبلد؟؟؟ امبارح و احنا رايحين نحضر ماتش الأهلي في نهائي بطولة افريقيا-بعيدا عن نتيجة الماتش- طبعا اول ما رحنا علشان ندخل من مكانا الطبيعي من المدخل اللي جنب بانوراما اكتوبر لقينا الامن
المركزي قافل المدخل ده و لازم نلف الناحية التانية من عند المنصة علشان ندخل..دول حوالي 2 كيلو.....كل ده حصل من غير اي تنويه و قلنا ماشي؟؟

السؤال المهم بقة؟؟
ليه علشان ندخل نلاقي كمية امن مركزي اكتر من اللي بنشفها في المظاهرات؟؟؟؟
لما جينا ندخل من جنب المنصة لقينا صف من الامن المركزي واقف و حاطط حواجز حديد....والصف دة مكون من 3صفوف من العساكر و كلهم مجهزين بالعصيان و الحواجز اللي بيشيلوها في ايديهم دي....؟
و اللي يحرق بقة ان سيادة الضابط الحاكم بأمر الله قال لحوالي 10000واحد ان مافيش دخول لأن الاماكن خلصت...مين اللي ملاها و احنا معانا تذاكر؟؟؟؟
المهم الناس هاجت عليهم و بما اننا كتير عرفنا نضغط عليهم و ماقدروش علينا و عدينا منهم.....بس لسه؟؟


لقينا صف تاني مجهز زي الأولاني....بس اول ما قربنا عليهم لاقينا الضابط بيقول (تقدم) و لقينا العالم دي هاجمة علينا لولا ان احنا و قفنا غصب عنهم و عددنا كبير لاول مر الاقيهم يخافوا يضربوا بس فيه كام واحد منا خادولهم كام ضربة على دماغوا منهم انا....بس عادي

عملنا زي الحاجز الأول و عدينا منهم لحد ما وصلنا عند بوابات الاستاد الالكترونية(دي معمولة علشان مافيش حد يعدي من غير تذكرة) و بمنتهى السهولة دخلنا بعد ما اللي على البوابات شافوا تذاكرنا...يعني الموضوع اصلان سهل
حد يفسرلي ليه الحواجز دي موجودة؟؟؟
بيمنعونا من ايه؟؟؟انا داخل اشجع بلدي علشان اسماها يعلا....تمنعني و تعمل كدة فيا ليه؟؟
تضربني ليه؟
و مادام المكان مصمم ان ماينفعش حد يدخل من غير تذكرة و الشعب دافع الفلوس اللي عملوا بيها النظام ده.....يبقي ليه الحواجز دي؟؟؟
يا ناس حد يفهمني الحواجز دي كانت معمولة ليه؟؟
بعد ما دخلنا من الجيش دة قلت لصاحبي حاجة( انا لو رايح اجيب مخدرات مش رايح اشجع بلدي ما كنش حصل ليا كدة) و هي دي الحقيقة
.احنا بقينا لازم ننضرب لوعايزين نعمل اي حاجة حلوة لبلدنا
رايحين ننتخب نضرب..رايحين نتظاهر مظاهرة سلمية في مكانا نضرب...نطالب بحقوقنا نضرب0..رايحين ماتش نضرب..رايحين مصيف نضرب.... طب ايه الحاجة اللي نعملها علشان مانضربش ؟؟؟

الاجابة: اسرق..انهب...انضم للحزب...اعمل اي حاجة غلط تضر بمصر....ماحدش يكلمك

هياجان جنسي في الشارع.....


. على غير عادتي النهاردة بدأت تصفحي للمدونات الصديقة فتحت الوعي المصري للزميل وائل عباس..واللي شفته ماكنش على البال

.فضيحة للي ماعندوش فضيحة..مهزلة هاتضرب سمعتنا الارض

.بجد نفس التصرف اللي بتعملوا الكلاب في الشارع

...جيمي كتب عنها في التخاريف و مالك كتب و عنده صور من عند وائل عباس.... حاجة مش عارف اوصفها

حوالي الف شاب في اول يوم العيد رايحين يحضروا سنيمات و فجاءة هاجوا كلهم و حصلتلهم حالة هياج جنسي و بقوا يمسكوا اي واحدة في الشارع (الكلام دة في وسط البلد) و يخلعوا هدومها و كل واحد يحاول يحصل منها على اللي يقدر عليه ...شفتوا وساخة كدة

خلاص يا ناس...الحالة وصلت بينا للدرجة دي...اغتصاب جماعي في الشارع للبنات

محدش افتكر ربنا في الالف شخص دول

محدش خاف تتطلع اللي بتغتصب دي امه ولا اخته ولا مراته..ولا دة تبع العادة الوسخة اللي جتلنا بتاعت مادام الحاجة مش بتاعتي يبقى تتحرق الدنيا..و مش مهم اي حد تاني... دي الحالة اللي بقيت حاكمة كل تصرفاتنا في الحياة

و الامن اللي بيتصرف عليه تسعة مليار جنيه في السنة.....كان فين ؟؟ بيقولوا ان ماكانش فيه 10 عساكر في المنطقة....احنا بنتكلم على وسط البلد خالوا بالكم؟؟؟

انا مش عارف اكتب ايه....كتير كتبوا على ظروف البلد بس مهما كانت الظروف....دة مش عذر ليها

.دة اسمه مسخرة و قلة ادب من شعب مصر انه يذل نفسه و يفضح نفسه قدام العالم كله

.جاتلي تلفونات من صحابي برة مصر يسألوني

حد يقوللي ارد عليهم اقول اي؟؟؟؟؟؟؟؟؟؟؟؟؟؟؟؟
الصورة من جريد الوعي المصري

حدائق الشيطان ...بلدنا


طبعا اغلبنا بيتفرج على مسلسل (حدائق الشيطان) اللي بيحكي قصة ظالم في الصعيد . ا
بس انا شايف ان محمد صفاء عامر الكاتب بتاع المسلسل مش بيحكي بس قصة نجع في الصعيد...لأ ده هو بيحكي حال مصر كلها في
المسلسل دة . و انا هاقولكم إزاي....ا
:دي قصة المسلسل و انتوا قولوا صح ولا غلط
واحد حاكم البلد من زمان غصب عنها..
عنده حرس كتير جدا شغلتهم يخوفوا الناس..
"عنده الغولة اللي بتاكل و تخفي اي حد يعارضه "امن الدولة..
لما بيمر في البلد البلد حالها بيقف..
زارع البلد مخدرات..بتاعنا بقه زارعها فساد..كدة كدة خراب للبلد..
اتجوز علشان يخلف ولد يورث كل حاجة...اظن انتوا فاهمين دي كويس..
بياكل و يشرب و يلبس احس لبس و البلد جعانة و مش لاقية تاكل..
الشعب اغلبوا راضي بالحال دة و فاكر ان دة العادي. لان الشعب كتير منه امي حسب سياسته..
فيه حبة من الشعب فهموا ان الوضع دة غلط و نفسهم يغيروا و ينضفوا البلد..
بقية الشعب مقسوم نصين..نص بيقول على الحبة دول ايه الهبل اللي بيعملوه ده..والنص التاني خايف من الغولة..
اظن هو دة حال بلدنا بالظبط....اللي شايف غير كدة يقولي
و سلامي لجناب البيه

مش فاهم


هو ايه اللي حصل

انا ماعرفش

شكلي لعبت في حاجة....هيه هي؟ انا ماعرفش

المهم ان المدونة باظت

و الانيل انها اتمسحت...... فا زي ما انتوا شايفين..... هابتدي من جديد

عادي يعني

........!!!!!!!!!صبرني يا رب

المهم.......!!!! اني

back تاني