لو عملناها يبقى ده بجد العيد القومي لمصر
ولو مرة واحدة كلنا نقول لأ
لأ للفساد
لأ لأكل حقوقنا
عايزين حياة كريمة
عايزين عيشة نضيفة
عايزين احترام
إدينا ف إدين بعض
نقدر نغير بلدنا
..........................
شكرا يساري
فيه سؤال بسيط شاغل دماغ العبد لله
نفطرض ان فيه سفينة حربية مصرية طالعين بعثة اليابان معدية من قناة بنما الي كانت تحت الحكم الامريكي
و اثناء ماهي معدية .. قرب منها مركب امريكي صغير
قام المصرين قعدوا بعلو صوتهم يقلولهم .. ابعدوا .. ابعدوا .. والنبي ابعدوا.. بس بالعربي
و الامريكيين الوحسين فضلوا يقربوا منها
قوم ايه ... المصرين ضربوا عليهم نار و موتوا واحد
السؤال بقه
ماذا سيكون رد الفعل الامريكي على مصر؟
هو نا عارف الاجابة و انتم عارفينها كمان
بس انا عايز الاجابة تفهمكم حاجة
مين الغالي و مين الرخيص عند بلده
مين اللي الحرب هاتقوم عشانه و مين اللي هايتنفضله
مين اللي عنده حكومة محترمة
- و لو في الظاهر علشان اللي هايعارضوني -
و مين اللي عنده شوية خو*** .. انتوا فاهمين
بس يا سيدي انت و هو
خلص السؤال
عارفين .. الحكومة بتاعتنا دي محظوظة
بقالها عشرات السنين منيمة الناس في الدرة
و شغلاهم بأي حاجة تانية غير البلد
مثلا الاهلي ده عندها فرخة بتبيض دهب
اوعوا تكونوا مصدقين ان من اول الريس و الاساتذة ولاده
و بقيت افراد الحكومة اهلاوية زي ما بيحاول الفشلة ( الزمالكاوية ) انهم يروجوا للموضوع ده
كل الموضوع انهم لقوا حاجة بقالها 4 سنين ورا بعض شاغله الناس عنهم و عن مصايبهم
الناس بقالها 4 سنين متاخدة مع الاهلي و سفرياته و متشاته و بطولاته
و اول ما الاهلي خسر بطولة افريقيا
حولوا الدعم كله للمنتخب الي برضوا كسب بطولة بعديها بشهريين
يعني حتى لو الزمالك كان مكان الاهلي – بعد الشر - كانوا هايكونوا عاملينلوا القلق ده كله برضه
و بعد ما الهليلة بتاعت كاس الامم خلصت
طلعونا موضوع الحضري اللي البلد كلها بقى ده محور اهتمامها
و تدخل السيد رئيس الجمهورية لحل الموضوع
كأن برجوع الحضري الهارب هاتتحل كل مشاكل مصر اللي مالهاش حصر
و فجأءة موضوع الحضري خلص
و فجأءه برضه لقت الحكومة نفسها قدام مشكلة مش موجودة حتى في اشد بلاد العالم فقرا في الوقت ده
بقى يا عالم الدولة اللي كانت سلة غلال امبراطورية كاملة حاكمة نص العالم
الناس فيها مش لاقية عيش تاكله
انا مش فاكر امتى كانت اخر مرة اسمع فيها ان فيه دولة فيها ازمة في العيش
تقريبا كانت المانيا بعد ما الحرب العالمية التانية ما خلصت و امريكا عملت جسر جوي و الكلام ده
بس لما تبقى دولة في العصر ده و ماكنتشي في حرب ولا حاجة
و كل يوم الحكومة بتاعتها تطلع بأرقام تدل على تحسن مستوى الاقتصاد في البلد
و ان احنا عايشين في احسن حته في العالم و الكلام العبيط بتاع مبارك الامن والالمان و الهبل ده
يبقى يا اما الشعب ده ابن كلب مفتري على الحكومة بالكدب و فعلا احنا احسن بلد في العالم
يا اما الحكومة و المسؤلين علينا كلهم حرامية و ناهبينا
عيب ما نبقى مش لاقين العيش الحاف حتى و تطلوبوا منا اننا نحب البلد
عيب لما الناس مابقتشي لاقية تاكل و تطلبوا منها انهم يعمروا البلد
عيب لما الناس مابقتشي عارفة تتنفس و تطلبوا منها انهم يخافوا على البلد
الظاهر ان حظ الحكومة خلص و مابقتشي لاقية حجة تلهي الناس بيها
او ممكن ان حتى موضوع العيش ده يكون تغطية على مصيبة اكبر داخلين عليها
الله اعلم
بس طول ما طقم الحرامية موجود يبقى اتوقع الاسواء
..............................................
كلمة اخيرة
عارفين الناس اللي رأيها ان مبارك احسن واحد في العالم علشان معيشنا في امن و امان بقاله 26 سنة
ممكن اعرف الامن و الامان عاملهم ايه و هما مش لاقين ياكلوا حتى عيش حاف
امال لو كنا دخلنا حرب كان زمان وضعنا ايه دلوقتي
عارف لما حد يحب حد قوي
انت اصلا عارف معني بيحبه قوي؟
انا فاهم معناها بس مش عارف اشرحها
مش عارف مين ابن الذين اللي اختصر الموضوع ده كله في حرفين
لما حد بيحب حد قوي
بيبقى عايز .......
للأسف برضه مش عارف اقول ايه
بيبقى حاسس ب ........
برضه مش عارف اوصف إزاي
بس عايز اوصف الالم اللي ممكن حبيب يعمله لحبيبه
و ده بقى اللي مالوش كلمة لا في العربي ولا في اي لغة علشان توصفه
لأن الالم د بيبقى فوق الوصف
و كمان لو الي بيسبب الالم ده مش بيحس بـألم التاني
و بيكرره اكتر من مرة
الالم بيزيد لمنتهاه
و بتبقى ساعتها فعلا
جهنم ارحم منه
الاشتراك في:
الرسائل (Atom)
.jpg)
