مبارك مش أبويا





تقدر تقولي ايه شعورك لما تصحى في يوم عاديييييي جدا
و تروح شغلك عااااادييييي جدا
و تبدأ تقرا جرايد اليوم زي كل يوم برضه عاااااااادي جدا
تقوم تلاقي دي عناوين الجرايد :
1- عنوان جريدة الاخبار : نورت بلدك .. يا ريس .
2- عنوان جريدة الجمهورية : مبارك عاد بسلامة الله إلى ارض الوطن
سرور : الأب رجع لأبنائه و يستكمل مسيرة الخير
الشريف : الحمدلله .. إنها عودة الروح للمصريين
3- عنوان الأهرام المسائي : .. وعادت الروح الى الوطن
مبارك يبادل مستقبليه و مصر كلها حبا بحب و شوقا بشوق
4- عنوان جريدة روز اليوسف : رسالة إلى الرئيس .. بعلم الوصول .. لحظة الوصول

أولا و أنا قاعد بكتب العناوين دي قاعد افكر في طريقة او قدر أكبر من السخرية علشان اتريق بيها على العناوين دي اللي باين قوي ان فيه شخص واحد بس هو اللي ممليها عليهم ماقدرتش.
زائد ان و انا بقراها كنت سامع مزيكة فرح و زفة صعيدي و مزمار و طبلة شغالة في دماغي لإن دي الحاجة الوحيدة اللي تناسب الهبل ده.
كل اللي عرفت اعمله اني فضلت اضحك كتير و انا قلبي وجعني على كمية التعريص الكتير اللي زادت عن الللزوم.
وإذا كنت عايز اقول حاجة فهي للمعلم سرور موافقة : مبارك مش ابويا ده واحد شغال عند الشعب بيقبض مرتبه منا و للأسف عايزين نمشيه علشان مش عامل شغله كويس و هو مش راضي .
كابتن الهتيفة الشريف : الوطن يا كابو لسه مرجعتلوش الروح الناس في الوطن لسه بتموت كل يوم من بلطجية الشرطة و وساخة الميه و عفانة الاكل و قرف الهوا و السرطان و الفشل الكلوي و الطرق و وهي في بيتها و اي وضع ممكن يكون فيه الانسان اذا كان نايم او صاحي في مصر هو خطر يهدده بالموت في اي وقت بلا سبب منطقي.
و بالنسبة لمبارك اللي قابل مستقبليه حبا بحب و شوقا بشوق,ماحدش خد باله ان كل اللي معاه في الصورة على الاقل بقالهم 20 سنة في مناصبهم لازم طبعا يبوسوا جزمة الزعيم اللي مخليهم في الهنا ده طول عمرهم.
و بعدين مين مصر اللي استقبلت الريس في شرم الشيخ؟ هو الزعيم المفدى مش عارف ان شرم الشيخ من المدن المحرمة على المصريين العاديين اللي بيترحلوا من المدينة دي كل شوية و يتقطع اكل عيشهم علشان هم مش قد المقام و كمان مشتبه فيهم ده اصلا لو عرفوا يدخلوها و مارجعتهمشي كماين الطريق.
وإذا كانت العناويين دي متوقعة من الجرايد دي لإننا اتعودنا عليها و لكن دخول القنوات التلفزيونية الخاصة في الزفة الخايبة دي و يعملولنا فواصل و يشغلولنا ماشربتش من نيلها و الكلام العبيط دي فعلا كان هو الزيادة عن اللزوم.
و انا اظن انه من الممكن مايكونشي جاتلهم تعليمات يعملوا كده
بس العقلية اللي بتبرع في التعريص ممكن تعمل ده من غير تعليمات.
عايز اقول اني و كام واحد اعرفهم ممكن يكونوا كتير شوية ماحدش فيهم فرح ان مبارك رجع و بقى فرعون مصر تاني لأنه ماحدش اولا فينا اختاره و ثانيا ان ماعملش لينا حاجة تخلينا فرحانين قوي انه رجع.. ده احنا بنعاني من اسواء الاوضاع اللي الواحد ممكن يعانيها في الدنيا.
فأغلبنا معندوش الحجات الرئيسية اللي بتدهولنا في المدرسة من مأكل و مشرب و مسكن كل ده مش موجود عندنا و لو موجود فا المأكل و المشرب مسمومين و المسكن هايقع.
و ده معناه ان سيادة الرئيس افقدنا الحاجة الوحيدة اللي كان الواحد بيملكها و هي كرامته.
بلدك مانورتش يا ريس .. بلدك تعبانة و ظروفها زي الزف و لو ناس مصر كلها تملك القدرة انها تسافر و تسيب البلد هاتمشي و ماحدش هايكون زعلان ابدا.
فيا ايتها الاخوة المعرصيين . كفوا ايديكم عنا وارحمونا
فمبارك مش ابويا .. انا ابويا في طنطا.