ماحدش هايتهان أكتر ما بيتهان دلوقتي



مسعد أبوفجر خرج أخيرا
مبروك
مش عايزكم تفهموني غلط
انا اكيد فرحان جدا أن مسعد خرج من الكرب اللي كان فيه
و أنه رجع لبيته
واثق كمان انه انشاءالله هايكمل اللي كان بيعمله
انا زعلان من حاجة تانية
ان مش الضغط الشعبي هو اللي خرجهمش ان شغلنا و واقفاتنا و مظاهرتنا و شغلنا بره و جوه هو اللي خرجه
و اللي مصدق في كده يبقى عبيط
الامن بيخرج و بيدخل اللي عايزه بمزاجه
و الحكومة ما زالت بتتصرف بمزاجها
مش خوفا منا
انا كمان بدأت افكر انها مابقتش ختى بتحط إعتبارات لصورتها قدام العالم زي ما كانت الاول
هي هاتعمل اللي عايزاه
و ماظنش انها كانت هاتعمل كده من غير ما ترستق نفسها بره
دعم من الرئاسة الأمريكية اللي وصلتلهم رسالة أعملوا اللي انتول عايزينه بس بلاش وش مع إسرائيل علشان احنا مشغولين بمشاكلنا الداخلية دلوقتي..الدنيا عندنا بتفلس و مش فاضينلكم خلينت نشوف حالنا.

و أصلا من ساعت ما أوباما ما جه مصر و بقه رضي الله عنه و انا عارف انها هاتقلب زفت علينا.
علشان كده احنا مش لاقين اي ضغط من حكومات بره على مصر.
و الناس بقت بتسبح بحمد بوش اللي كان قافش على مبارك.
ولازم الناس تفهم ان مافيش حد هامه لا حقوق انسان ولا حيوان في مصر.
مادام مصلحة بلده ماشية تتحرق اي حاجة نانية.
لما قابلنا وزير التعاون الدنماركي و بضنت عليه بسؤال انا عارف اجابته بس كان نفسي اسمعه من حد في مركزه.
السؤال كان ليه الحكومات الغربية مازالت بتدعم الحكومات الدكتاتورية في المنطقة عندنا ماديا و اعلاميا و زيارات متبادلة و كله سمن على عسل و في نفس الوقت فاشخة دماغنا بمبادئ الديموقراطية و الحريات؟
وكانت الاجابة لما رخمت عليه اكتر و مطالبته بتوضيح اجاباته الدبلوماسية انه قال احنا عايزين ديموقراطية بشروطنا.
واهو الشعب ماحلوقاه من العالم كله دلوقتي و ماحدش سائل فيه.
ماهو اللي مش عايز يجيب حقه بإيده ماحدش هايجبهوله.
ما زلت مصر ان احنا - مش عارف مين احنا بالضبط- لازم نوصل للناس العادية اللي مالهاش في اي حاجة و نسخنهم.
ايوة نسخنهم زي ما بنسخن حد على حد علشان يتخانق معاه ولا يضربه.
زي ما بنسخن عساكر الامن المركزي على الضباط في المظاهرات.
لازم نقلهم و نعرفهم انهم مابقاش عندهم حاجة يخسروها.
كده كده عيالهم مش هايبقى ليهم مستقبل لو ماتحركوش من دلوقتي.
اصل ماحدش هايجوع اكتر ما الناس جعانة دلوقتي.
اصل ماحدش هايتهان أكتر ما بيتهان دلوقتي.
لازم نوصلهم رسالة :
لو عايزين خير لعيالكم يا تتحركوا و تاخدوا حقكم بإديكم يا إما عمركم لا انتم و لا عيالكم هاتشوفوا خير.
وقال يا فرعون ايه فرعنك؟؟ قال : مالقتش حد يلمني
نهاية الأرسال

خالد و أوسكار و الناس

كل ما افكر في مشكلتنا السودة اللي احنا عايشينها دلوقتي اقتنع اكتر ان الحل في ايدينا
الحل في ان اعداد الناس اللي بتنزل بجد الشارع علشان تقول لأ هو الحل
ان خروجنا من الفئة اللي بتنزل الشارع و بتنزل الفيسبوك برضه هو التغيير
ان زي ما العمال بدإت تفهم الحل ايه و طريقته ازاي لازم الناس الباقية يوصلهم الكلام ده.
اليومين اللي فاتوا قابلت موقفين متشابهين في دولتين مختلفتين
و مش عايز اتكلم على موقف الحكومة فيهم علشان ماحدش يقولي دي مصر و دي امريكا
انا هاتكلم على رد الفعل الشعبي للناس بعد اللي حصل
كلكم عارفين طبعا قضية خالد سعيد و اللي حصل فيها
و الشباب ماقصروش دعاية ليها و شغل عليها في كل الدنيا , بس أونلاين بس.
و الوقفة اللي الصامتة- مش عارف كانت صامتة ليه؟- اللي اتعملت يوم 9
بس هم هم نفس الناس اللي نزلت في الف حاجة قبل كده هم اللي نزلوا الوقفة دي مع زيادات لا تذكر.
القضية التانية هي قضية شاب أسود من مدينة أوكلاند -واخد بالك مني يا عرباوي-اسمه اوسكار جرانت, تم توقيفه في محطة المترو و الضابط ضربه بالنار في ضهره و الواد مات.
الضابط اتحول للمحكمة في خلال اسبوع و من يومين طلع الحكم بالقتل الخطاء على الضابط.

و دي اللحظة اللي عايز اقارن بيها بن رد فعل الناس في مصر و الناس في أوكلاند
قضية خالد عرفناها بعد كام يوم من ما حصلت و اخدنا وقت وصل لشهرين لحد ما الناس نزلت في وقفة (صامتة) بطلوع الروح؟؟
بس اللي حصل هنا و بعد نص ساعة بس من صدور الحكم بالقتل الخطاء على الضابط
أوكلاند اتقلبت ناس في الشارع مظاهرات اعتراضا على اللي الحكم
و المظاهرات بدأت سلمية و بعد كده اتحولت لتحطيم محلات و سرقة
انا مش عايز ان ده يحصل طبعا في مصر
بس رد الفعل السريع للناس اول ما عرفت الحكم هو ده الفرق
انني ماستناش وقت طويل و يكون اللي حصل حصل و النار بردت
ان الناس تنزل و تاخد موقف في وقتها هو اللي هايوقف ان ده يحصل
و انا قصدي هنا الناس العدية سكان منطقة خالد سعيد مثلا و لا الشارع بتاعه حتى و ليه اسكندرية كلها ما نزلتش تقول لأ للكلاب اللي قتلوا ابنهم.
ليه الوضع عادي لحد دلوقتي و اراهن ان 70 % من اسكندرية ماتعرفش حاجة؟

اذا كانت الجرايد هنا في سان فرانسيسكو كتبت عن موضوع خالد
ليه الناس في مصر كلها ماقلبتش الدنيا على الكلاب دول؟
ايه هي الوصلة المقطوعة بينا و بين بقيت الناس اللي ما عرفتش بالموضوع؟
و ايه هي مشكلة الناس اللي عرفت و هم مش قليلين و مانزلوش؟
و ايه اللي بيخالي المواضيع عندنا تاخد وقت طويل قوي لحد ما تتحرك؟
و ليه لازم ننظم مظاهرة؟
ليه الناس نفسها مابتنزلشي لوحدها من غير ما حد يقولها؟؟
دي كلها اسئلة محتاجين لإجابتها علشان رد فعلنا تجاه جرايم الخنازير يبقى اسرع.