نوعدكم.......عريانين في الشارع


كنا امبارح كلنا تقريبا ملمومين


انا و جيمي و ايوب و وائل و شرقاوي و سيزر و ضياء اتقابلنا على البورصة


كانت اول مرة اشوف ايوب بعد ما خرج


اتكلمنا كتير و رغينا كتير


و بعد كدة قمنا و رحنا نحضر مهرجان السينما المستقلة في روابط


و حضرنا حفلة بعده لفرقة جميلة جدا


غنت لنجم و الشيخ امام و فيروز و بانوا لسعاد حسني


المهم بعد كدة روحنا القهوة و كل شوية حد يقوم يعمل حاجة و يرجع


و في مرة كنت انا و جيمي بس الي قاعدين


فا فتحنا موضوع ان لو المعلم اتكل هانعمل ايه؟؟؟


قام جيمي قال: البلد هاتبقى في فوضى اكبر من من اللي حصل في 77


و هتكون فيه فرصة ان الشعب يتحرك علشان لأول مرة الشعب اللي يحكم نفسه


و كفاية هاتقود حركة الثورة دي


كل واحد في حتته هاينظم اللي معاه علشان نغير البلد


و لو ما تحركش الشعب و الفرصة دي عدت يبقى مش هايتحرك عمره تاني و يبقى كل عام و انتم بخير


و الأستاذ ابنه هايمسك البلد


قمت انا في النقطة دي قلت : لأ


انا حالف انه لو ورثنا هاخرج انشالله لوحدي عريان في الشارع


و جيمي قال : ما انا ناوي كده برضه


فا نداء للأخوة المواطنين


اتحركوا


احسن تلاقونا انا و جيمي بنجري عريانين في الشارع


و بصراحة


منظرنا مش هايبقى لطيف

هناك ١٤ تعليقًا:

غير معرف يقول...

ياريت والنبي تجروا عريانين علشان تطلع حركة جديدة او فكرة جديدة لشوية مدونات او لبتوع الحركات الهبلة علشان يستغلوها هيسموها حركة البسوا متفهمنيش غلط بس هو الموقف بيقولوا كده
ام عن الموقف في ما بعد فما سيحدث يثير القلق والرعب فليس هناك احتمال لانتقال السلطة لاحد تلك الحركة كفاية او الاشتركين الثورين او شايفنكم او الشارع لنا بدون نزاعات دموية سيفقد الكثير ارواحهم خلالهم ولا احد يستطيع ان يتخيل حدة التوترات ولكن الارجح هو انتقال السلطة بالتوريث الا اذا تدخلت قوي خارجية او غير الاخوان فلسفتهم من عدم الصدام لمحاولات الوصول للسلطة وقتها يجب ان تقف المعارضة جنبا لجنب مع اعضائ الوطني الرافضين للتوريث حتي يبقا سلاح الجيش ضعيفا والا اتكل علي الله وجهز نفسك واقلع وادعي تكون الدنيا حر وانا هنزل اتفرج عليك

غير معرف يقول...

please don do it ..your family and friends will be ashamed of you ..
el masry affendi

SaSo يقول...

"اعتصام العرايا"
"عرياينين من أجل التغيير"
فكره احتجاجيه متبعه ف دول كتير.انشالله هنقلع كلنا يامان

Gemyhood يقول...

المشكلة انى بحاول امسك فى اى امل

معظم الىل قلته انا عارف انه مش هايتحقق بس لازم نقوه

حاجة كدة زى

كلام الاستهلاك المحلى

غير معرف يقول...

عريانين اكتلر من كدة اية بس دة مفيش حد متغطى دلوقتى ماكلنا بنجرى سلط ملط مش لازم لبسنا يكون علينا علشان نكون عريانين لا احنا عقولنا عريانة وقلوبنا عريانة وروحنا عريانة واجسامنا عريانة يبقى اية الجديد اللى هيحصل بقى هيقولوا عليكوا دى موضة وهيطنشوا وهيقفوا على اهيف حاجة ويعملوا عليها قضية راى عام انما انتوا لو جريتوا ملط حتى علشان الحكم والبلد والريس والكلام دة هيشدوكوا على اى معتقل ظريف لطيف وهيوروكوا العرى بجد على اصولو عارفين عرى ايى ؟ عرى الكرامة هيجردوكوا من كل حاجة وابقوا اشبعوا بقى بالجرى ملط ساعتها وسلمولى على مولد سيدى العريان
اختكوا صولة

ألِف يقول...

معاكم يا زعيم.

أهو على الاقل نقلع بمزاجنا.

دا هيبقى منظر عِرّة :)

IBN BAHYA - إبــن بهيـــــــــــــة يقول...

عادي يا ابو الشباب .. راح يقولوا عليك مختل عقليا وتحصل بتاع بني مزار بس للأسف السادات في السجن ومش حتلاقي اللي يطلعك منها ... عموماً أنا معاك في المظاهره العرياني .. يا ريت لو تعمموا النداء ده ونجهز لأن الأبعد مش هيرجع من ألمانيا إلا في صندوق .. كنت باتمنى يطلع عندنا ولد فال حلو كده زي نيجيريا ويخليه يرجع على النيجر زي صاحبه ولد طايع أمريكا لكن للأسف الجيش عندنا بقى في الطراوه بحكمة الزعيم المزعوم
ربك يعدلها
تحياتي لكم جميعا
أنا معكما ولو عايزني أنزل من النهارده حتى

IBN BAHYA - إبــن بهيـــــــــــــة يقول...

أنا طبعا مع إخواني اللي قالوا هيكون منظر عره .. بس ياترى فيه أعر من اللي احنا فيه ده ؟؟؟ ما أظنش

غير معرف يقول...

coooooooool.gamda mooooot ya man we elly yes2alko ollllo elhaya ba2et tahn moot.

غير معرف يقول...

لا يا عم عريانين ايه ومسخرة ايه
انا لو جمال مسك ها اتحجب
اه والله
ها ادعو لمظاهرة للرجال فقط
وكلنا ها نلبس طرح !!!
واللي يزعل من بتوع المنظمات النسائية يتفلق !!!

دماغ ماك يقول...

شكرا لدعم اخواني العريانين
و متخافوش الجو انشاءالله هايكون صيف
......................
وائل عباس
.....................
عادي برضه ..نتحجب و نلبس طرح على دماغنا بس ننزل عريانين برضه

إيمــــان ســعد يقول...

ههههههههههههههههه

الحاجة الوحيدة المتوقعة ان حد ح يلمكوا في عربية السرايا الصفراء

مفيش امل من المواضيع ده

بلا غم

تحياتي

محمد زوام يقول...

و مالة يا أخويا ...عريان عريان .أنا أعرف واحد صاحبى أسمة جورج عريان وأبوة عريان من ييجى 70 سنة وشوية وما جرالهوش حاجة ما هو الشعب كلة عريان ..و العريان مش بس عريان لبس ده عريان لبس وأكل و شرب وتعليم ومعاملة ادمية فى العمل والشارع وقسم الشرطة اللى كانت فى خدمة الشعب وبقت الشرطة والشعب فى خدمة الوطن ودلوقتى بقت الشعب والوطن والشرطة فى خدمة طقم أسنان عمو الحاكم وأبنة جيمى zawam333@hotmail.com

غير معرف يقول...

أنا من أوائل الناس إللي هيشتركو في إعتصام العرايا
بس الله يخليك بلاش نعمله في وسط البلد
وانت عارف ممكن يجرالنا إيه هناك