خطبة جمعة في اليكس


بقالي كتير جدا ما سافرتش اسكندرية فاقلت انزل اقضي يومين هناك في الاجازة و سافرت امبارح الخميس و روحت ابات
و طبعا بما ان نومي خفيف صحيت على صوت الخطبة بس بما اني كنت نايم تعبان فا فضلت سامع الخطبة على خفيف لحد ما سمعت كلمة (رئيس الجمهورية) و مصدقتش؟
فجاءة سمعت الكلمة دي من الخطيب اللي لاحظت في بداية خطبته انه من الاخوان
فا فتحت عيني و قلت اقوم اسمع الخطبة
و سمعت اللي ماكنتش اتصوروا
الخطبة كلها كانت عن التعديلات الدستورية الجديدة و إزاي ان التعديلات دي كلها بتخالف الشريعة الاسلامية و دي نقطة انا مافكرتش فيها قبل كدة مع انها مهمة جدا
و يمكن تخلي المحكمة الدستورية ترفضها كلها لأنها مخالفة صريحة للشريعة
لأنها بتلغي جميع الحربات الشخصية اللي منصوص عليها في الدين و في الدستور و حاجات بسيطة جدا و معروف انها حقوق للمواطنة كلها هاتلغي
و زي ما قلت في تدوينة قبل كدة ان هايكون للحكومة القدرة على خطف زي التجسس على اي شخص لمجرد الاشتباه فيه و كمان دخول اي منزل و تفتيشه و كل ده من غير إستأذان النيابة او امر قضائي
و دي حاجات كها مخالفة للدين الأسلامي و بالتالي للقانون لأن الشريعة الأسلامية هي مصدر التشريعات في الدستور
نرجع بقه لموضوع سيادة الرئيس اللي سمعت الكلمة دي بتتذكر لاول مرة و كان بيتهاجم في الخطبة
(لانه سجن كثير من الاخوان المواطنين الشرفاء و صادر فلوسهم و حتى لما المحاكم برأتهم ما رجعش فلوسهم ليهم ولازم يقام عليه حد السرقة هو و الحكومة الظالمة) تخيلوا سمعت كده
و إزاي بيحاكم الناس دي محاكمات عسكرية في الوقت اللي بيقتل بالألف مصري ماتحاكمش اصلا و أظن ان عنده حق
الراجل دة ادى للناس تفسيرات كويسة جدا إزاي ان التعديلات دي هاتلغي كل الحقوق المشروعة و الطبيعية للناس و أظن ان اغلب الناس صدقته لانه كان بيتكلم بالعقل

و كمان كان بيجيب التفسير الحقيقي للايات اللي بتنص على الحريات الشخصية و تأكد انها من الحرمات

وكمان على حقوق المواطنة و عدم الاكراه في الدين و شدد و شرح فيها كتير

و ماكنش بيرغي في الفاضي زي اغلب خطباء الاوقاف التعبانين

و الراجل ده لتاني مرة بقول انه كان عنده حق

إحنا هانضيع لو موضوع التعديلات دي عدت من مجلس الشعب كما هو متوقع
بس كده الاخوان فتحوا المواجهة علني ضد الريس بذكرهم صفته
وكده كل واحد بيقول للتاني خلاص انا مش ساكت
ربنا يستر و تعدي الايام دي على خير

سلام من اليكس

هناك ٧ تعليقات:

AbdElRaHmaN Ayyash يقول...

:D اخيرا
والله كان نفسي اسمع حاجه زي دي من زمان
يا ماك انا كنت في مؤتمر من يومين في نادي الاطباء هنا في المنصورة
دكاترة الاقتصاد السياسي والعلوم السياسية اتكلموا
دي هتكون مهزلة
هنتبهدل بمعنى الكلمة
الراس الكبيرة هيكون فيها كل حاجه وتقدر تعمل كل حاجه
سلطاته هتزيد مش هتقل
هيكون وقتها من المستحيلات ان يطلع منافس لجمال على الوراثة بتاعة ابوه
وهلم جرا
بس انا متأكد ان الراجل اللي خطب عنده حق
ويا سلام لو ده كان حال كل مساجدنا ..
الوضع أكيد كان هيختلف
سلام

محمود سعيد يقول...

صاحب الدماغ
مش عارف منين حكمت انت وانت قاعد فى بيتكم أن الخطيب ده إخوان

ولكن هو فعلاً 90% ممكن يكون إخوان

ومش عارف أنت مستغرب ازاى يكون الإخوان فتحوا المواجهة علنى ضد الرئيس
انا مستغرب انك اول مرة تعرف
وانك بتعد موقف أحد الخطباء هو موقف الإخوان

لكن فعلاً الإخوان من أيام الملك حتى فاتحين المواجهة ضده بصفته علنياً

وانا اعرف ان فى خطباء من ده كتير
أو على الأقل عندنا فى الأسكندرية
مش عارف إيه وضع القاهرة بس أظن فى مناطق مناطق

bluestone يقول...

وعد قاطع من مواطنة مصرية مسيحية اللي هو انا
ان استمع لجميع خطب الجمعة
شرط
ان تكون كلها زي الخطبة دي

لست مع الاخوان
اختلف معهم قلبا وقالبا
ولكن مبدأ توجيه الخطاب الديني لما فيه من شأن الناس ونفعهم دي حاجة تفرح جدا

بليز اوعى تنشر اسم الراجل ولا الجامع او الحي اللي اتكلم فيه وإلا المسكين هيتشيع

دماغ ماك يقول...

mahmoud sa3eed
awlan ana 3ereft enno e7'wan men el kalam elly 2alo fe el 7'otba..ana mesh 3ayel so3'ayer we ba3raf afham za2ed enny kaman sa2alt 2arayby elly saknen ganb el game3 we 2aloly enno e7'wan we 2o3tekel abl keda...el mawdo3 sahl awy enny a3raf
...........................
bluestone
sada2eny ana moshkelty ka moslem el 7amdollah basaly kol el salawat en sa3et salat el gom3a bala2y 7'otab 3'areba wala ka2eny 3ayesh ayam el mamaleek wala game3 byetkalem fe mashakel el nas we 7e2o2hom wala 7aga...kolo byetkalem fe el dein bas ma3a enn el masged doroh mesh ta3ref el nas bel dein bas da kaman bye3arf el nas 7e2o2hom we ye7el mashakel 7ayathom....bas 3andena 7asarna dor el ma3bad el deinny (masged aw kenesa) fe el dein bas
any way
thx 2 much

جبهة التهييس الشعبية يقول...

الحرية للعريف الوطني محمد خلف

غير معرف يقول...

لازم فعلا ينتشر التوعية دي و بشكل واسع جدا على ادمغة الناس دي كلها

غير معرف يقول...

لازم يكون الراجل ده من الاخوان لسبب بسيط جدا مافيش امام مسجد ها يجرؤ يتكلم أى كلمة لانه موظف لو فكر يعملها هيلاقى ناس تشيله من على المنبر ويروح ورا الشمس وولاده يتشردوا وعيشه يتقطع مش هو ده اللى احنا ممسوكين بيه دلوقتى لقمة العيش !!!!!!!!!!!!!!لكن الراجل بتاع الاخوان مش هماه حاجة بايع همره ومضحى بنفسه علشان عنده مبدأ مؤمن بيه مع العلم انا بختلف مع الاخوان ولا أؤيدهم على الاطلاق لكن دى كلمة حق لازم تتقال