كلام واحد محدوف

قريت الخبر ده النهاردة في موقع المصريون و اتجننت
نقلت جريدة الميدان عن المفكر الإسلامي المعروف د .عبد الصبور شاهين دعوته لملاحقة العلمانيين والملحدين الموجودين بجامعة الأزهر ووصفهم بأنهم على شاكلة المدون كريم عامر الذي تمت محاكمته مؤخرا في قضية إزدراء أديان تم الحكم عليه بالسجن 4 سنوات منها 3سنوات بتهمه إهانة الإسلام وسنة بتهمة إهانة الرئيس .
وتساءل شاهين في تصريحاته التي نقلتها الميدان : لماذا تتم محاكمة كريم عامر منفردا بهذه التهمة ( الإلحاد و إزدراء الأديان ) وهناك الألوف غيره من العلمانيين ما زالوا طلقاء ؟
هو الراجل ده بيتكلم بجد؟؟
انا مش مصدق
يعني ايه؟؟
الناس تنزل تلم الملحدين من الشارع؟؟
طب و نعرفهم ازاي
بيبقوا حاطين ورده حمرا في جيب الجاكتة
طب يا عم المفكر الاسلامي العظيم ربنا لما قال (لا إكراه في الدين) نعمل للكلام ده ايه؟
و بعدين هو كريم بقه خلاص عبره لمن يعتبر؟؟
يا عم روح والله ماهي نقصاك
عيب عليك تقول كلام زي ده
الدين ده حاجة بين الانسان و ربه
ماحدش يحاسب حد عليها
روح حاسب المسلمين اللي بيسيؤا للاسلام اكتر من الملحدين
انا مسلم و الحمدلله مابسبش فرض
بس ده مش كلام مسلم فاهم دينه ابدا
فكر تاني لو سمحت يا عم المحموء على البلد و الاسلام قوي كده
ماهو برضه اللي حاكمينا كلهم مسلمين
عملوا ايه
مش المفروض تحاسب المسلمين اللي بالاسم الاول و بعدين تشوف الباقيين
يا ريت ما تبقاش محدوف قوي في الكلام بعد كده

هناك ٨ تعليقات:

غير معرف يقول...


ياعم دا ابن وسخه اهبل ومحدش ياخد عليه ماهو دا اللي رفع قضية الردة والتفرقة بين نصر حامد ومراته وهوا اللي وقف له في رسالة الدكتوراة بتاعته
دا حمار ومالهوش غير انه يفسي ليل نهار عل قفانا ولاد الهبلة اللي زيه ياما واللي على شاكلته هو وزغلول النجار وبقية الدجالين
يا اخي والله ساعات بفتكر الأمام محمد عبدة وجمال الدين الأفغاني والشيخ شلتوت وغيرهم الناس دي ازاي خلفها ناس زي البهايم دول؟

جبهة التهييس الشعبية يقول...

والله ياريتهم كانوا حاكموه ايام الكتاب بتاعه عشان يدوق من نفس الكاس اللي بيحرض بيه على العيال

حسبي الله ونعم الوكيل

الأغاني للرأفتاني يقول...

انا عاوز اعرف ايه اللى حصل ل
" لكم دينكم ولى دين"
الدكتور الهمام ده نسى..ان الله غنى عن كل العالمين..وسوى زاد او نقص عدد الملحدين والعلمانين كما وصفهم الدكتور العبقرى فلن يضر هذا من ملك الله شئ..
والاجدى بهذا الدكتور الجاهل هو الحرص على تثقيف الجهله من دعاه الاسلام..الذين كما قلت..اضروا بالاسلام اكثر من نفعهم له

تحياتى

غير معرف يقول...

المشكلة يا دماغ أن بيجي بعد كده حد يبرر محاكمة عبد الكريم بأنه زودها و يقولك مفيش حاجة ضد الالحاد أو نقد الدين لكن المشكلة في اللي بيشتم

أهوه يا أخوانا اتفرجوا، الراجل مش عاوز يحاكم اللي بيشتم عاوز يحاكم اللي مش مؤمن، عاوز يفتش في قلوب و عقول و ضمائر الناس.

بلاش استهبال بقى الكل فاهم و عارف أخرة المشوار ده ايه و عارف أن لا يمكن ينحصر الملاحقة و المحاكمة و الحبس على الناس الكخة اللي زي عبد الكريم، و النهاردة ملاحدة، بكره شيعة بعده مسيحيين و بعده أي مسلم مش عاجبهم.محدش في أمان و سلملي على دين التسامح و السلام اللي مفيهوش اكراه.

admelmasry يقول...

طب تفتكر هو ممكن يقرا رسالتك

لازم نتحد كلنا ويكون صوتنا اقوي من كدا بكتير

كل المحاولات الفردية لن تجدي نجاح

الحل الوحيد هو التكتلات

دماغ ماك يقول...

انا عادة مابحبش اشتم حد
بس ده اصلان جايب الشيتيمة لنفسه
يعني ماشفتهوش هو و الشلة بتاعته قالوا كلمة قبل كده على الاخوة المسلمين اللي ماسكينا و خاربينها
حسبي الله و نعم الوكيل

ROMIL يقول...

الغريب فعلا أنه كان متهم بالكفر وأزدراء الأديان
دنيا وكله بيعيش الدور

تحياتي

ROMIL

غير معرف يقول...

حضرت مرة خطبة جمعة لعبد الصبور شاهين في منفاه في حدائق الأهرام وكان كلها تحريض على غير المسلمين. الرجل فعلاً مريض ومحتاج مساعدة نفسية. المشكلة إن يكون في حد بيسمعله أو بياخج على كلامه. كمان عبد الصبور شاهين سبب مباشر في هجرة عقول مصرية كتيرة خارج مصر خوفًا منه هو شخصية وشلة المحامين إللي حواليه.