بلا هبل


إمبارح اتفرجت على فيلم بابل

الفيلم كان رائع اخراجه جامد و من اصغر طفل فيه

لأكبر نجم فيه كان تمثيلهم فوق الوصف

مع اني شايف ان الممثلين المغاربة فيه كان تمثيلهم اقوى

المهم ان الفيلم ده بيحكي إزاي ان كل شخص في العالم ده بيأثر في الشخص التاني حتى لو على بعد الالف الاميال

من غير ما يعرف

ان العالم ده كله حاجة واحدة بتأثر في بعض

على الاقل انا فهمته كده

الفيلم بيحكي حكاية واحد ياباني عنده بنت خرسه و مراته كانت انتحرت

و بنته ليها قصة لوحدها و هو كان مرة في المغرب بيصتاد

قام اهدى بندقيته للدليل المغربي اللي كان معاه

و الدليل المغربي باع البندقية لراعي غنم عنده طفلين بيرعوا الغنم و بيخدوا البندقية معاهم

و هم كانوا مرة بيهزروا بالبندقية ضربوا رصاصة جت في وحدة امريكية كانت سايحة في المغرب هي و جوزها

و كانو سايبين ولادهم مع المربية المكسيكية في امريكا اللي خادت ولادهم و راحت تحضر فرح ابنها في المكسيك

يعني لفه كبيرة قوي

و طبعا امريكا قالت ان دي حادثة ارهابية كالعادة و قلبت الدنيا

الفيلم كان فيه واحد مترجمه من الاخوة الجمال قوي

بتوع عليك اللعنة و تبا لك

المهم و انا قاعد قدام الكمبيوتر و بتفرج على اخر مشهد

و المشهد قوي جدا و جامد قوي الاقي الاخ المترجم كاتب تعليق على احداث الفيلم

التعليق بيقول

(من اجل عاهرة امريكية تقوم الدنيا .. اين هم من قتلانا باللأف؟؟ )

اقوله أيه ده والنبي

هو غلطت الدول المحترمة انها بتقلب الدنيا علشان حد منها اتأذى

ولا دي غلطت حكوماتنا الهبلة

هو انت بتحاسبهم علشان بيهتموا بشعوبهم و مش بيهتموا بشعوبنا؟؟

مين اللي مفروض يتحاسب

حكوماتهم ولا حكومتنا

انت زعلان منهم ليه

هما المفروض يهتموا بينا ليه

و اصلان حكوماتنا منفضلنا

بطلوا رمي الغلط على الغير

و حاولوا تصلحوا في نفسكم الاول

لأن طول ما بنرمي سبب خيبيتنا على غيرنا

يبقى عمرنا ما هانبقى دول محترمة

سلام

هناك ١٦ تعليقًا:

zenzana يقول...

انت مستغرب؟
او مندهش؟
دا بس سيادتك بما اننا كمجتمع عربي ولا مصري ولا كل الحركات دي

واخدين علي الموت فداء للحكومة والنظام علي طريقة (حش وارمي)زي الشوام ما بيقولوا، يعني الالف ف العبارة عادي، كام مية بني ادم ف قطر الصعيد مش مهم وايه يعني؟

ويتقولي يتغيروا؟
عشان يتغيروا دي شغلانة يدينا ويديك طولة العمر اذا ما موتناش ناقصين عمر

Cluster One يقول...

انت مشفتش اللى حصل لطلبة الامتياز بتوع جامعتنا
http://polesapart3.blogspot.com/2007/05/blog-post_22.html

غير معرف يقول...

loooooool anta z3lan leh tayeb ? ... mat7'leeek zay b2eet el sah3b mnafad we marw2 dma3'ak ya mak...
y3ne hya gat 3la dee .... ma fehh balwee tanya kteeeeeeeeer....
hya asln htfdal kda tool malnas kda we m7dash rade ya3'yer man nafso ..
s7eee7 2b2a shooof 3ande el band ale 2ultlak 3leh... salmz

سكوت هنصوت يقول...

ليك حق يتحرق دمك...بس تقول ايه..البلد كلها عندها توخلوف عقلي...معلش...الراجل المترجم ده اصلة ... ما عرفش فحياتة حاجة اسمها حقوق...يبقى ازاي عايزة يفهم ان دولة بحالها..عايزة تدافع عن حقوق ( شوف الإستفزاز ياجدع) مواطنة واحدة...لا والأكادة بقى ان الموطنة دي..اصلا ست منحلة...يعني مشيها مشي بطال ولا مؤاخذة( مع ان الفيلم حسب روايتك بيقول انها كانت متجوزة) لكن قاعدة قذف المحصنات لا تطبق عند الفرنجة...تحياتي..

دماغ ماك يقول...

el moshkela enaha kanet set sharefa we metgaweza we 3andaha 3ayelen...bas heya madam men amreka lazem tob2a 3ahera,,,omm el tafker el; mota7'alef

Gemyhood يقول...

ماهو الفيلم دة ياض كان عندى على الجهاز انت ماشوفتوش و لا ايه ساعتها

بصراحة اخراج الفيلم هايل قوى

غير معرف يقول...

مــــاجد باشـــــــــا
والله يا بنى انت بتفهم علشان قلت الكلام ده تحس اننا عندنا صرم من الناس دى هما ممكن يهدوا الدنيا علشان طفل علشان عاهرة لان دول فى مفهومهم ان دول بنى ادمين لكن احنا فى مفهومنا اننا كلاب والحكومة بتاعتنا فاهمة عننا كده الاخ الى حاقد على الناس دول ياريت توصله كلمه واحده وهى اتلهى

خيرالدين يقول...

هى دى افلام ؟؟؟؟؟؟؟؟
روائع السينما المصريه كذلك فى الزمالك ....والفنان المتألق حسين الامام

غير معرف يقول...

m3lesh ya3nee.. mafesh a7san enak tshooof babel men gher targama.. da hadaf el film.. enak matefhamsh wala logha feeh we tefham be your sense that we are all humans and think the same :)...

Great moviee.. really great one

غير معرف يقول...

Hehehehe...ana ebn 3ammy 7asallo nafs el 7ewar da benafs el targama deh..el 3alam el mota7'alefa elly bettargem fe DVD4arab dool 3ayzeen el 7ar2..we ana men zaman rameet tobet-hom we bageeb taragem english 10/10...ana kot batfarrag 3ala memento ta2reban we 7ad fel film bey2ol " Sounds good.." fa el motargem 2am metargemha " Aswat tayeba..." hatny mel ard sa3etha men kotr el de7k :D

3'eer kol da...7atta law heya "3ahera" fe3lan...hal howa sazeg awy kda...da film ya3ny ! fe a !...ba3deen aywa ya seedy...men agl 3ahera americeya el donya 2amet...maho da el mafrood...msh zamb el scenarist en 7adretak mowaten men balad law 7asallak feha 7aga msh hayes2alo felly 7'alefook...asef 3al ra3'y we shokran 3al tadwena

Amira يقول...

شوقتني جدا اشوف الفيلم يا ماك

الحكومتين يتلاموا
حكومتنا و حكومتهم
تحياتي ليك و لعرض وجهة نظرك عن الفيلم

غير معرف يقول...

صباح الفل
انت مش شفت الفيلم كامل ولا ايه
ومعؤفتش العيال الصغيرين كانوا بيعملوا ايه مع بعض قبل الحادثة
ولا عرفت ان الواد الكبير كان بيتفرج على اخته وهى بتخلع هدومها
المهم
انت مش شفت المخرج اساسا بيحاول يقول ايه لأنك مش شفت المشاهد المؤثرة فى الفيلم
واللى طلعت العرب رعاه الغنم اهم حاجة عندهم الجنس حتى مع الخواتهم وامهاتهم
شكرا

غير معرف يقول...

انا شدني جدا التعليق الاخير

انا لسة قارية و سايبة تعليقي عن الفيلم في مدونة تانية
http://egyptianocd.blogspot.com/2007/08/blog-post_28.html
اعتقد
egyptianocd
مش حيمانع اني احط اللينك

و منها وصلت للبوست بتاعك انت عن الفيلم و المترجم الاهبل

اساسا بعيدا عن الفيلم نفسه، المترجم مترجم مش محلل و لا معلق، ايه اللي حشره؟
ثانيا نرجع للتعليق الاخير اللي مركز علي العيوب دي و ازاي الفيلم الامريكي يطلعها:

1- العرب رعاة غنم
2- العيال كانو بيعملو ايه و كان بيتفرج علي اخته في الحمام
و منها استخلص الاخ المعلق ان المخرج عايز يقول ان "العرب رعاه الغنم اهم حاجة عندهم الجنس حتى مع الخواتهم وامهاتهم" مش بس كده ده صور الامر ان ده الهدف الاساسي للمخرج و اللي ما شفش كده يبقي ما شفش المشاهد المؤثرة في الفيلم

ردي:
كونه مصور شخصية اسرة من رعاة الغنم ده لا يعني ان كل العرب رعاة غنم!!!! مجرد ان الشخصية دي هي اللي حتخدم تسلسل الاحداث، امال يجيب عيل بيلعب بلاي ستيشن في البيت و بعدين يطلع من الشباك يضرب رصاص!!!

النقطة التانية،اللي بيعمله الولد المغربي (لو قصدك علي العادة السرية) بيعمله الاولاد في اي زمان و مكان مش عند العرب بس... بعض الاطفال في سن صغير زي ده، بنات او اولاد بيكون عندهم فضول جنسي لاكتشاف نفسهم و حدودهم و تأثيرهم علي الاخر، ده سن ال sexual initiation
في السن ده لسه ما فيش وازع اخلاقي لأن لسة متكونش الضمير و الخوف من الله عند الطفل
مش معني كده ان العرب همهم الجنس بدليل توبيخ الاخ و صدمة الاب في الابن و البنت و ضربه ليهم
و فين بيعمله كده مع امهاتهم ده؟ ما فيش كده في الفيلم، حضرتك اللي شفت حاجات المخرج ما قالهاش و لا لمح لها اساسا... ده اللي علي راسه بطحة و لا ايه؟؟
طيب ما هو طلع البنت اليابانية اللي تقريبا في نفس السن عندها رغبة في اكتشاف نفسها كأنثبي بأي ثمن و مع اي شخص كان، الطبيب او رجل الشرطة

مش بادافع عن ده، ده سلوك مرضي، بس الفيلم ما شتمش في العرب بتاتا

بالنسبة بقي "للمشاهد المؤثرة" في الفيلم، حضرتك اللي الظاهر مشفتهاش، الفيلم له قراءة مغايرة تماما، واضح ان كل واحد بيقرأ اللي ما بين السطور حسب اللي جواه

و عجبي

غير معرف يقول...

ردا علي القراءة الغريبة للفيلم لاخر معلق
حأحط قراءتي للفيلم و تعليقي عنه زي ما ارسلته علي مدونة
egyptianocd
تعليقا برضه علي جملة الاخ المترجم الغريبة

"
الفيلم فعلا لا ينتقد العرب، و لا يقوم علي فكرة انقاذ الامريكية و بالتالي يتجاهل قضية العرب ضحايا الحروب... و لماذا نعتها بالعاهرة؟؟؟ فين الموضوعية؟؟؟ دي مجرد سائحة امريكية، زوجة و ام كانت بصحبة زوجها في رحلة

فكرة الفيلم ابسط من كده بكتير... أحداث الفيلم تدور حول ان العالم مكان صغير جدا و ان حدث تدخلت الصدفة البحتة في وقوعه قد يؤثر علي اشخاص مختلفة في عدة بقاع من الارض: المغرب، المكسيك، امريكا، اليابان... و قد لا يعلم اي فرد منهم بالاخر رغم تأثرهم بنفس الحدث... رأيت في الفيلم كيف انه يريد ان يظهر ان البشر تجمعهم اشياء اكثر بكثير من التي تفرقهم، المشاعر و الطبيعة البشرية واحدة رغم الاختلاف، الفرح البسيط المقام في القرية المكسيكية يماثل افراح القري المصرية بشكل هائل...كما يلقي الفيلم بالضوء علي الضعف البشري و كيف انه واحد بين كل البشر علي اختلاف افكارهم، حياتهم، ثقافتهم، هويتهم...ة
الاحداث مجرد حجة لحكمة كبيرة و هي : "نحن البشر واحد، دعونا لا نختلف دعونا نتحاب، دعونا لا نحاكم علي بعضنا البعض، دعونا نقترب من بعض" ...ة

مضمون الفيلم مؤثر فعلا، كنت قد قرأت نقد عن ضعف الحبكة الدرامية و سذاجتها، و لكني اعجبت جدا بالفيلم، موسيقي و احاسيس و ضعف انساني رائع تصويره

اما النقطة الاخري و هي اظهار بعض العيوب في المجتمعات العربية، فهذا شئ حقيقي و لا يمكن انكاره، كما تم تصويره في كل المجتمعات التي يتناولها الفيلم: الفقر في المكسيك، البيروقراطية و عدم الانسانية في امريكا، تغرب ووحدة الانسان في مجتمع متقدم!! جنوني في اليابان... من ناحية اخري كما ذكرت انت، تلك القرية الفقيرة علي الرغم من فقر امكانياتها هي التي رعت الامريكية في حين تخلي عنها رفاقها و مواطنوها، من القذارة و التخلف برز الحنان و الرعاية و الكرم... و قد تجلي هذا في المشهد الاخير في القرية عندما عرض البطل زوج المصابة بمبلغ مادي كبير علي المرشد المغربي لقاء رعايته و استضافتهم في بيته المتواضع فكان رفض المرشد دليل علي كرامة و نبل رائعين... بالعكس تماما الفيلم يحض علي عدم التسرع في الاحكام، حيث تسرعت وسائل الاعلام في تصوير الحادث بالارهابي فكادت ان تكون السائحة ضحية بيروقراطية بلادها و لعبة السياسة اللا انسانية، الفيلم يحض علي الانسانية و ان الانسان يجب ان يكون فوق اي اعتبارات

لا ادري لماذا يصمم البعض علي تشويه و شيطنة قيمة جيدة، هل هو جهل و تشدد عقيم لقضية تجعله يري ما هو بجانبها ضدها؟؟
"

الجهل وحش اوي يا جدعان

غير معرف يقول...

والله واااااااااااااااااايد حلوة مشكوووووووووووووووووووووووووووووور

غير معرف يقول...

Спасибо понравилось ! Thanks !