i'm back ya'll


بقالي فترة عايز ارجع اكتب تاني
كنت بمر بحالة نفسية وحشة
هي اللي خالتني ابطل كتابة
بس في الشهرين اللي فاتوا دول
حجات كتير اتغيرت في حياتي
صحاب طلعوا مش صحاب
ومش صحاب طلعوا احسن من صحاب
شفت فساد كتير في اماكن لو الدنيا كلها فيها فساد
المكان ده بالذات ماينفعش يكون فيه
كل ما الوقت يمر عليا الاقي الدنيا اوحش مما كنت عارفها
و بتضيق على ناسها اكتر ما عي ضيقة
بتخنق فيهم اكتر و اكتر
الاهمال والفساد مابقاش حاجة بسيطة
بقى بيقتل الناس كل يوم
و بمنتهى البشاعة
منتهى القسوة
بمنتهى الغرابة
بمنتهى الحلاوة
بمنتهى الفهلوة
بقت كل حاجة بالفهلوة
التفكير اللي عند اي حد
إزاي امص دم اللي قدامي
واطلع منه بأي مصلحة
مايهمنيش انه يتصاب
انه يتأذي
ولا حتى يموت
انا والسلام
انشالله تولع
انا مالي
ما كل الناس كده
كل الناس مقضياها
تعبت
فعلا تعبت
كرهت منظر البلد
كرهت تعاملات الناس في البلد
كرهت اني لما اجي اقول صباح الخير
يا اما الشخص اللي بقولهاله يستغرب اني بقوله كده و انا ماعرفوش
يا يطلب بقشيش علشان يرد
كرهت تكشيرة الناس وهما ماشين في الشارع او و هما بيكلموا بعض
مش عارف اقول ايه ولا ايه
انا اول ما بدأت اكتب هنا
كان نفسي اكتب عن سلوكيات الناس مع بعض
بس لقيت ان في حاجات اسواء كتير في البلد من سلوكيات الناس مع بعض
زي سلوكيات الحكومة مع الناس
اللي هي السبب الرئيسي في ان الناس بيعاملوا بعض كده
انا مش عارف هاوصل لأيه في اخر البوست ده
بس انا كنت عايز اكتب
فا سبت نفسي تكتب
كأني بفكر
ولا بكلم نفسي
فا لو مافهمتش انا عاوز اقولك ايه
ولا احكيلك ايه
دي مش غلطتك
ده هو ده اللي دماغي عايزاه
انك تفكر و تقول ليه و أزاي؟؟
طب و نعمل ايه؟؟
و نحل أزاي؟؟
و بعد كده تتكلم
وتعلي صوتك
بالغنى بقه ولا بالصويت
ولا انشالله بالجبنة والزتون
دي مش مشكلتي
ولا اقولك
دي مشكلتي
ان الناس تتكلم
فا هارجع ازن تاني
و دماغي هاترغي تاني
فاهلا بيكم تاني
مع دماغ لن تنساك
مع دماغ ماك

هناك ٤ تعليقات:

غير معرف يقول...

ماك بجد انت اجمد دماغ..دماغ بتفكر فى كل واى تصرف بتشوفو ومش بتعدى اى حاجه كده وخلاص

انا فى منتهى السعاده انك رجعت تانى ويارب تستمر فى الكتابه يارب

صدقنى انا من الناس الى بتتاثر بكلامك جداااا والله العظيم بتحرك جوايا احاسيس حد عايز يعمل حاجه وبيحاول وهحاول بس خليك اتكلم وارجع تانى

ربنا يوفقك..وافتكر ان فى ناس والله بتتاثر بكلامك

... amr يقول...

:) ... im happy coz u r back mac

welcome back boddy :)))

غير معرف يقول...

يا بختك انك قدرت ترجع او علي الاقل انك
تشوف بطرقة مختلفة سواء كانت احسن او اوحش المهم انك كان عندك اختيارين وانت ليك حق الاختيار...
تعرف ان دي اول مرة في حياتي اكتب او ارد علي او في اي مدونة لكن بجد انا فرحان انك رجعت

MaMaDo يقول...

فيلم رصيف نمرة 5: أخو مرات فريد شوقي بيقوله " تحب تكسب 50 جني ف يوم واحد" رد فريد "ازاي"
قاله " بالحداءة و الشتارة والفهلوة"
قام فريد قاله "لا, دا يبقي اسمه النسب"
تتم اضافة الطاء و الصاد بدلا من التاء و السين لضبط الجملة. و لكن المراد ان الفهلوة عنصر مصري أصيل له تأثيره في التركيبة السيكولوجية والاجتماعية المصرية.
معلش يا نجم, ايدي كالتني علي كلمتين مقعريين كدة
سلام