بلد المليون شهيد

في مصر
مافيش حد بيبذل اي جهد علشان يموت
قصدي ان احتمالات موتك مرتفعة عن اي مكان في العالم

نبتدي كده والنبي واحدة واحدة

لو نايم : في احتمالات كتيرة

يا اما كائنات فضائية حاتهجم عليك و تقتلك و تاخد اعضائك

و بعدين يتهموا مجنون القرية و بعديها يطلع براءة

يا اما كائنات (أمنية) هاتهجم عليك و تخطفك

و هاتموت بالتعذيب عندهم في الاخر برضه

يا اما صخرة هاتقع عليك و (تسحقك) و الحكومة هاتكسل تجيبك

فاهيردموا عليك و يحتسبوك شهيدا

علشان كدة بقيت لما اقفل التليفون مع حد قبل ما انام اقوله : خالي بالك من نفسك وانت نايم

إزاي ؟؟؟؟ ماعرفش

المهم ... عديت من النوم و صحيت

لو لقيت ميه .. و جيت تغسل وشك .. الميه دي ملوثة

و ممكن تجيبلك سرطان يموتك

لو جيت تفطر . اسف.. لو لقيت فطار يعني .. يا سلاااااام .. في حاجات كتير بقه

اولا اغلب الاكل فيه مواد مسرطنة

كباية الشاي ماتعرفش الشاي منين زائد اننا قلنا ان المية ملوثة

ممكن مسمار او حشرة من العيش( ده لو برضه لقيت عيش )يموتوك

فرضنا انك عديت من المغارز دي

هاتنزل تروح الشغل(ده لو عندك اصلا شغل)هاتعمل ايه؟

لو لقيت مواصلات

لو ركبت ميكروباص فيه احتمالين

يا اما السواق البطجي هايقتلك علشان اعترضت على زيادة الاجرة

يا اما و انت واقفين في حد هايخبطكوا من ورا فاهتدخلوا في قطر معدي و تموت

بلاش الميكروباص

خليها اوتوبيس

في حلين

يا اما هاينط بيك من فوق كوبري السيدة عائشة

يا اما هايديك كورس غطس في النيل و كده كده هاتموت

وهاتكون شهيد

لو هاتركب قطر.. دي حاجة جميلة

يالحرق..يا اما هتخبط في قطر تاني

و كده كده مش هانلاقيلك بقايا

بس حاسب !! هانعتبرك شهيد

لو امك دعيالك و رحت الخليج

و حبيت تزور اهلك بس على قد حالك

هاتركب عبارة

اساسي انك هاتتحرق الاول و بعدين هاتغرق

و اوعى وشك .. انت شهيد يا ريس

طب لو بلدك اتكرمت عليك و بعتتك بعثة برة

و ركبت الطيار يا معلم و صرفوا عليك دم قلبهم

طيارتك هاتقع .. مافيش حل

و الجميل انك شهيد

طب يا عم والله مانا راكب

هامشي .. دي بق فيها احتمالات اكبر

يا اما عربية هاتخبطك علشان ماعندناش مرور اصلا

او هاتقع في بلاعة

او كائنات (أمنية) هاتخطفك تاني و تعذبك و هاتموت

او الكائنات الامنية هاتضرب عليك رصاص مطاطي في مخك او عينك

علشان انت معدي من جنب مظاهرة

و انت مالكش دعوة بيها اصلان

لو عديت من ده

و اليوم عدى بسلام

حبيت تخرج تتفرج على حاجة محترمة مرة في حياتك

و قلت في نفسك كده يا واد روح مسرح

و قدرت تعدي من اللي فات ده كله علشان توصل للمسرح حي

و وصلت ..فل عليك كده؟

عيب عليك

هاتنحرق يا معلم

و هايقفلوا الباب عليك

ده حتى اعداد رجال المطافي اللي بيموتوا عندنا في الحرايق

اعلى من عدد الضحايا نفسهم

لو بقى عزرائيل كان حالقلك كل ده و روحت

بعد ما عديت من بلاوي الشارع للمرة التالتة

في كام احتمال

يا اما الكائنات الامنية هاتيجي تخطفك و تعذبك وتقتلك كالعادة

او يغتصبوا عيلتك كلها قدامك و في الاخر يرموك من البلكونة

او ان جوزك او مراتك يقتلوك من كتر ماهم قرفانين

مما يعطيك الاحساس ان المركز الرئيسى لعزرائيل فاتحه في مصر

او ان مصر بما انها رائدة دايما

فا اظن انها عايزة تنافس الجزائر في لقب بلد المليون شهيد

علشان كده كل الناس اللي تموتهم بتقول عليهم شهداء

او اني مت اصلان و بحاول اوصلك رسالة

انك تنفض و ماتخفش

فا أنت اصلا لو عايش و ساكت على اللي بيحصل في البلد

فانت اصلا ميت

ولست بشهيد