لو ربنا سمع للبهايم

مش عارف ليه فيه ناس متخصصة في شعورك بالاحباط

بأن مافيش فايدة

انك مهما عملت مش هاتوصل لنتيجة

ان انت .... انت بتعمل ايه اصلا؟

ليه الناس في بلدنا كده

ليه ساكتة و شايلة على قلبها

منفضة للظلم و القهر اللي هي فيه

و عايشة حياتها بتدعي على الظالمين و خلاص

مفيش حد فيهم بيحاول ياخد حقه و حق بلده

كله مأنتخ و يارب على الظالم و المفتري و بس

لا بيفكر يمنع الظلم ازاي ولا يقف في وشي

و طول ما الشر بعيد عني يبقى مافيش مشكلة

مش عارف ان الشر هايوصله في يوم من الايام

مش عارف ان فيه امين هايرخم عليه في يوم جاي

ان فيه ظابط هايعذبه منظرة في يوم جاي

انه مش هيلاقي ياكل في يوم جاي

ان ابنه هايتحرق في شغله في يوم جاي

ان بنته هاتنتهك في الشارع في يوم جاي

انه هايموت من المرض في يوم جاي

انه كان يمكن يعيش في حرية في يوم مش باين انه جاي

كل الناس ساكتة و فالحة تقطم فيك

و يضحكوا و يقلولك اللي بتعمله ده عبط

هو اللي قبليك عملوا ايه؟

بس مش هاقول انا هاصمد و هافضل اناضل و الكلام الكبير الل مابفهموش ده

انا بس هافضل ادور على حريتي

هافضل ادور على بلدي

عايز اعيش محترم في بلدي

واللي عايز يفضل ساكت ... يفضل

بس هايفضل طول عمره زي الحمار

بيشيل و يضرب و يسمع الكلام

بهيمة عايشة وخلاص

و يروحوا يصلوا الجمعة و الاحد

و يسمعوا ان الساكت عن الحق شيطان اخرس

و يقولوا اعوذ بالله و باسم المسيح

خليهم نايمين على دعائهم و صلاتهم

و قبلوني لو ربنا سمع للبهايم