رسالة الى الزعيم شيخ الحارة

Down with Mubarak

الى سيادة الزعيم شيخ الحارة
تحية مش طيبة و بعد....
بما اني ماتعلمتش و مارحتش مدارس
انا و تلات تربع ولاد الحارة
علشان سيتك مش شايف ان العلام ليه لازمة لحبة عيال صيع
فانا مدي 2جنيه لعم ابراهيم العرضحالجي علشان يكتبلنا البوقيين دول
سيادة الزعيم
في ذكرى عيد ميلادك اللي باحتفل بيه وعهدالله من يوم ماتولدت و ماشفتش غيره
عايز احكيلك عاللي بيحصل في الحتة
ابويا يا عم الشيخ كلاويه باظت من مية المجاري اللي اللي بنشربها كل يوم
و امي نظرها ضاع من الخضار اللي بيقولوا انوا اسرائيلي
واخويا الكبير مشوه من المصنع و بيضرب بانجوا و ظابط القسم (الله يعمر بيته) مشغله مرشد
اما عم على الفرارجي بقى شغال في الحسين على باب الله (شحات يعني) بعد ما الفلوانزا بتاعت الفراخ دي و الحكومة (الله يعمر بيتها برضه) قفلتله المحل
اما البت منى بيني و بينك بقت شغالة رقاصة و ربنا فتحها عليها و قال ايه بتسافر الخليج ترقص هناك بس ده كله بعد ما مرسي خاطبها الله يرحمه انتحر بعد 7 سنين خطوبة و ماعرفش يجيب شقة
اما عم ميخائيل مسؤول نضافة الحارة لسه في المستشفى بيتعالج بعد ما خادله رصاصة من الحكومة لما جم يدبحولوا خنازيره. قال ليه علشان ماتجبلناش الفوانزا
اما محمود بن عمي الكبير فا زي مانت عارف بعد ما رجع من السعودية من 15 سنة و الحكومة(الله يعمر بتها تالت) واخداه ومش عارفينله اثر.
اما الواد مسعود بن عم جابالله حالله كرب مانت عارف انه عسكري عند حد من البشوات و مطلع عينه ولا العبيد بيتوع زمان
و الست ام قرني من يوم ما بتها وقع في الزلزال من 17 سنة و المحافظ بيقولها هايديها شقة و من يوميها قاعدة في الخيمة
اما قرني نفسه بقى تاجر حشيش على قده كده و برضه شغال مرشد للبيه ظابط القسم
و سيد من ساعت ما غرق في العبارة و امه اتجننت و ماشية تولول في الشوارع
و سعيد من ساعت ماتحرق في القطر و ابوه مشلول
و عبدالله من ساعت ما غرق و هو مهاجر اطاليا و مراته و عياله عند اهلها
وانت عارف ان المدرسة الوحيدة اللي ف المنطقة قلبوها مول
و المستشفى الوحيدة اللي في المنطقة هايقلبوها جراش
و المجاري عملالنا بحر في الحارة بدل مصاريف المصيف الكتير
و الكهربا اللي بيقولوا انها هايوصلوهلنا من ساعت ما بنوا السد العالى..الا هو صحيح خلصوا بنا فيه ولا لسه؟
المهم ان الحالة عال العال زي مانت شايف اهو و ربنا كارمنا و سايبنا عايشين
عايشين زي كلاب السكك اه بس عايشين
خيرك على الحارة مغرقنا
و الناس مس عايزة حاجة
اوعى تصدق ان الناش مش لاقية تاكل ولا تشرب
ماهو لو كانوا مش لاقين ياكلو و يشربوا كانوا ماتوا
بس اديهم عايشين اهم
وابنك بسمالله ما شاء الله منورنا في كل بيت في الحارة
بياكل و يشرب و ينام معانا
و بينام معانا
و بينام معانا
اه و هو بينام معانا
بيتعب والله
ادي اخبارنا يا زعيمنا يا شيخ الحارة
قوللي انت ايه اخبارك؟