الاهانة باتلف و باتلف و ترجع لصاحبها

قشطة على الصور يابوحاتم..حاططلك واحدة جامدة اهو


يبدوا ان
ان ايه؟
ان حبة ناس من البلد دي مفهاش فايدة
قولي ليه؟
علشان احنا مع بعضينا
ولأول مرة لوحدينا
والداخلية فاشخة فينا
لييه لييه قوللليييي ليه؟
كفاية حليم و شادية علشان البي**ن.
المهم انا عايز احكي على موقف كده حصلي امبارح
كنت رايح عند صاحبتي علشان خارجين
و لسه جاي اقف قدام العمارة بتاعتها
لقيت واحد كده خير الله ما اجعله خير لبس بدلة سمني في سمني و عليه حتة شنب يا جدعان
يابوووووووووووووي ,, يجف عليه الصجر
حاجة شبه مجدي الجلاد كده
حيث مافيش جسم .. فيه طول و شنب
لقيته بيزعقلي و بيقوللي ,, اطلع اطلع و بيشوح بإديه
و انا لا بحب حد يزعقلي و لا حد يشوحلي
قمت راكن العربية و رحتله
قبل ما اوصله كنت فهمت هو زعقلي ليه
اصل عربية سيادة الوزير حاتم الجبلي (الله يعمر بيته و يبعد شر الخنازير عنه) اللي ساكن في نفس العمارة كانت ورايا.
و (ابو شنب كما سأدعوه لاحقا) كان عايز يظهر انه شايف شغله كويس قدام الباشا الوزير اللي وزارته موحولة اليومين دول باانفلوانزات كتير.
علشان الباشا الوزير يقوله (عفارم عليك يابوشنب)
المهم ان الاسانسيرات كانت عطلانة
فالوزير قعد في العربية و من غير مايتكلم شاف المنظر التالي:
انا : ايه ياعم انت بتزعق ليه؟
ابوشنب : عايز ايه يعني؟
انا : عايز افهم انت بتزعقلي ليه و بمناسبة ايه؟
ابو شنب : علشان كنت واقف و معطل الطريق (الكلام ده في جاردن سيتي ورا السفارة الامريكية حيث اصلان مافيش عربيات بتدخل الا اللي ساكنين هنا ) والناس وراك.
انا : وافرض حتى اني وقفت بأي حق تزعقلي؟
ابوشنب : (وهو بيفتح الجاكت علشان يبينلي السلاح اللي في جنبه) ازعق براحتي.
انا : لا يا حيلتها ماتزعقش براحتك , وزي مانت بتعرف تزعق كل الناس بتعرف تزعق.
ابوشنب : (ببلاهه و عدم مقدرته على الرد السريع وحتى يأخذ وقت في التفكير) كل الناس بتعرف تزعق؟
انا : اه .. زي مانا بزعقلك كده.
ابو شنب : طب مش الموضوع خلص؟
انا : لأ لسه ماخلصش
ابو شنب : طب عايز ايه يعني؟
انا : افهم مين ادالك الحق تزعقلي ؟ كان ايه المشكلة لو كنت قلتلي لو سمحت تتحرك علشان الطريق بأدب و احترام؟
انا مش طالب اكتر من كده.
ابو شنب : (ببلاهه تاني و عدم مقدرته على الرد السريع وحتى يأخذ وقت في التفكير تاني)ادب واحترام ؟؟؟(مخه مش فاهم) طب عايز ايه؟ (سألها للمرة المليون الغبي) مني يعني؟
انا : هو انت يا عم مابتفهمش عربي؟ بقولك كنت تقولي اتفضل بأدب و بس.

ابو شنب : (و هو بيزعق برضه) طب اتفضل يا سيدي.
انا : (و انا بلف و بمشي و بضرب كف في كف و باتجنن)مافيش فايدة-مافيش فايدة .
---------------------------
حاتم بيه انت و زمايلك في الطرابيزة:
هو الحارس بتاعك ده اللي مفروض انه خايف عليك و بيحميك مش شايف انه بتصرفاته دي مع الناس بيكبر كره الناس في الوزارة و الحكومة اكتر ما هم مكروهين؟اصل الحكاية مش ناقصة.
مش شايف ان بتعامله مع الناس كده ممكن حد بقى (مختل عقليا بجد) ينتقم منه في شخصك علشان انت اللي بتخليه يعمل كده مع الناس؟ ولا ايه.
يعني بدل ما يحرسك هايتسبب في قتلك؟
و لأمتى ضباط وزارة الحرامية قصدي الداخلية هايفضلوا يتعاملوا مع الناس بالحقارة و الوساخة دي؟ كأن الناس عبيد عندهم.
مع ان لو فيه عبيد المفروض تبقوا انتوا العبيد علشان احنا اللي بنديكم مرتباتكم و مصاريفكم و بدالاتكم و منها فلوس العربية الاودي كيو 7 اللي انت راكبها و ماعرفش انت جبت تمنها ازاي؟
طريقة تعاملهم دي هاتوصلهم لنتيجة واحدة بس
ان الناس هاتكررههم اكتر و اكتر و اول ناس هايتئذوا لو حصل اي تغير في البلد هايكونوا هما.
لأن ماحدش مهما كانت شخصيته بينسى الاهانة اللي حصلتله ولا حصلت لحد قريب ليه او يعرفه.
اهي الاهانة دي كمان هاتلف و هاتلف و ترجع لصاحبها
و ابقى والنبي هاتلك واحد بيعرف يفكر و يتصرف بسرعة
بدل ما ساعت القدر يروح يتهته و يسأل اللي بيقتلك
انت عايز ايه؟


هناك تعليق واحد:

ذو النون المصري يقول...

و انت منتظر ايه من افراد الحكومه اكتر من كده
دا كويس انه كمان قبل يتكلم معاك بالصورة اللي بتحكيها و معملش اكتر من كده
تحياتي