ماتشركناش في حوار معاك لو سمحت



تصميم جمال مبارك على فتح حوار مع الشباب غريب فعلا
فجمال مبارك يعلم انه لا توجد له اي ارضية في الشارع المصري
و خصوصا بين الشباب
وان مافيش حد فيهم طايقه هو و شلة لجنة السياسات من رجال الاعمال الذين يملكون كل خيرات البلاد
و ايضا شباب ( البدل ) اللي بيظهروا معاه في اعلانات الحزب اللي مش وطني ولا ديموقراطي في وسائل الاعلام
فلا ينفع ان اظهر دائما مرتديا افخم البدلات مع اغنى اغنياء مصر ثم اطلب ان افتح حوار مع شاب لا يملك ثمن ساندوتش طعمية
لأننا لن نفهم بعض ابدا
ده اسمه هبل و عبط
و محاولة فاشلة منه للوصول للناس اللي كارهاه و مش قابلاه
لأنه مش هايعرف يجاوب على اي سؤال من الاسئلة اللي هايتسئلها
جمال مبارك مولود في فمه معلقة دهب
ماجعشي ولا صاعشي في الشوارع
مادخلشي مدارس لا تعرف معنى التربية او التعليم
ماتعبشي وملقاش مستشفى و لو كان لقاها ماكنش هايلاقي فلوس العلاج
ماركبشي مواصلات
ماوقفشي في طوابير
مافيش امين شرطة مالوش لازمة كدره في الشارع
ماصاعشي و قعد على قهاوي علشان مش لاقي شغل بعد الكلية
ماحتاجشي واسطة علشان يجيب رغيف عيش
ماتحرقلوش قريب في مسرح او قطر
ماغرقلوش صاحب و هو طفشان من البلد عايم بين قارة و قارة
عيلته ماضعتش في عبارة
بيت ماتهدش بصخرة جبل وقعت عليه
ماجلوش فشل كلوي من الميه
مامرضشي بالسرطان من الاكل
اي حد في مصر ماحصلوش الكلام ده اصلا المفروض يسحبوا منه الجنسية
دي مواطنته ناقصه كده اصلا
ماخدش ختم النسر
و بعدين ممكن حضرتك توريني محاسب في مصر وصل للي انت وصلتله في سنك ده ولا انشالله كان عنده 100 سنة
وارجوك احترم عقلي وماتفكرش تقنعني ان ده بمجهودك
وان الله لا يضيع اجر من احسن عملا
ومن زرع حصد
والمرتة في قعر الحلة
وكل الامثال دي علشان الحجات دي مش شغالة في مصر
من الاخر انت وصلت لده علشان ابوك رئيس جمهورية
و من غيره كان زمانك هاتبقى لسه محاسب في اي بنك
علشان كل ده مش هاتعرف تجاوب على ولا سؤال حد هايسألهولك
واظن زمانك شفت الاسئلة
واستبعدتها كلها
الا سؤال واحد من ابو بدلة دول بيسألك
ماهو تصورك لمستقبل مصر يا سيادة الرئيس
مما سيجبرني على اصدار اصوات من انفي وفمي
لا ادري ان كان يعاقب عليها القانون
هو الصوت ده صحيح
يعاقب عليه القانون؟
يا جيمي والنبي فكك منا
انت هاتكسب انتخبات بالتزوير
زي ما حكومة البلد دي طول عمرها بتعمل
انتوا مش بتشتغلوا علشان مصلحة البلد
كل ده لمصلحتكم الشخصية
30 سنة ماعملتوش فيها حاجة
دانتوا ضيعتوها اكتر
فالو كنت شغاليين للبلد يبقوا سيبوا حد تاني يجرب بقه
لأن اللي ماعرفشي في كل العمر ده مش هايجي دلوقتي و يعرف
من الاخر الناس كارهينك ومش مصدقينك
وانا عارف انك مش مصدق احصائيات الحكومة اللي بتقولك ان الدنيا ربيع و الجو بديع
وان كل اللي بتعمله ده شو و خلاص
ونيتك انك تيجي غصب عنا
ارحل عنا احسنلك
سافر و خد ابوك معاك و روحوا بلد الاكسلانسات
(اهو كلام مسرح الهناجر بتاع ابوك ده اللي مضيعه)
و يعم وعد مني من هاندور وراكوا
بس ارحمونا بقه واخفوا بليز
عارف ان كلامي بقه صريح قوي
بس خلاص مابقاش ليا نفس أألف و اداري
غور يعني من الاخر

***********************
مقالي على مدونات كاتب

هناك ٣ تعليقات:

mohammed atef يقول...

مش عايزيين جمال مبارك ولا عايزيين نشاركه فى حاجه
عايزينه يرحل عننا وينسى أنه فى ممكن يشاركنا فى بلدنا
أحنا بنرفضه وبنلعنه وبنكرهه ومش ممكن يوم واحد نقبل نشاركه فى أى حاجه
لانه لا منا ولا علينا

mohammed atef يقول...

مش عايزيين جمال مبارك ولا عايزيين نشاركه فى حاجه
عايزينه يرحل عننا وينسى أنه فى ممكن يشاركنا فى بلدنا
أحنا بنرفضه وبنلعنه وبنكرهه ومش ممكن يوم واحد نقبل نشاركه فى أى حاجه
لانه لا منا ولا علينا

غير معرف يقول...

لو سمحت يا صاحب المدونة

يا ريت تشيل كلمة عليهم السلام دى من على الصورة ... يا ريت فعلا تغيرها .. و لك جزيل الشكر