هو انا حمار ؟؟؟


بقالي فترة كبيرة جدا ماكتبتش حاجة . ممكن أني زهقت اني افضل ألعن واشتم في أحوال البلد لأن القرف مابينتهيش. بس فيه سؤال من زمان الواحد بيتسأله و كنت دايما مش برد عليه و كتر قوي السؤال ده بعد وصول د. محمد البرادعي و الرغي الكتير اللي بيحصل اليومين دول في الجرايد و التلفزيونات. السؤال بيجيلك من ناس المفروض انها محسوبة على النخبة المثقفة من البني أدمين اللي عايشين في البلد . و سبب عدم إجابتي عليه انه مفيش إجابة دائما على سؤال غبي او السؤال اللي بيخليك تحس بمراهقة تفكير الشخص اللي بيسألهولك . غير انه بيفترض فيك صفة (الحمورية) الشديدة و أن مافيش فايدة فيك.
السؤال بيكون غالبا على أكثر من طريقة , و هم :

1- هاتنتخب مين في إنتخابات الرئاسة القادمة؟
2- هل ممكن ترشح جمال مبارك ؟
3- مش هاتأيد البرادعي بقه ؟
المهم ان مضمون السؤال دائما انت هاترشح مين؟
ولما السؤال ده بتسأله دايما مخي بيترجمه كالأتي : - هو انت حمار؟
و حان وقت تفسير ليه مخي بيترجمه كده. كلنا نفسنا ان مصر تكون دولة ديموقراطية يحكم فيها الشعب و ليس فرعون و تكون هناك مؤسسات فعلية يقدر ان يحاسب فيها الشعب رئيسه و حكومته و ان يغيرهم
اذا اخطئوا في حملهم للأمانة الملقى على عاتقهم. ولكن -اسف على الفصحى الكتير دي- للأسف لا توجد ثقافة الديموقراطية عند كثير ممن يتشدقون بها ليل نهار- حلوة يتشدقون بها دي.
نرجع من الأول .


اولا احنا محتاجين نغير طريقة الانتخابات و نحولها لإنتخابات حقيقية مش تمثيلية و ليلة و جرايد تكتب و مدونين ينزلوا يغطوا الانتهاكات.
انا عايز انتخابات اقدر اروح فيها ببطاقة الرقم القومي مش بالبتاعة البطاقة الانتخابية اللي هي احد نتاج العبقرية المصرية من اجل الوصول الى اكبر قدر من التزوير.
كده ابقى قدرت فعلا اختار الشخص اللي انا عايزه يقضيلي مصلحتي في البلد و يدي للبلد حقها.
محتاج القضاء يرجع يراقب الانتخابات.
محتاج حاجة زي القانون الامريكي كده اللي بيقولك ممنوع اقتراب اي فرد من افراد الشرطة من اي صندوق انتخاب لمسافة نصف ميل تقريبا او 500 ياردة حاجة زي كده المهم انم مايبقوش موجودين.
محتاج ان قوانين اعادة الانتخاب للرئيس تتغير.

ان رئيس الدولة مايبقاش رئيس حزب.

ان رئيس الدولة مايخترش الحكومة, الناس هي اللي تختارها.
يعني تقريبا نفس طلبات البرادعى اللي كل الناس قريتها و هنا بس ممكن اقول اني بأيد البرادعي في طلباته دي فقط لاغير .

ليه بقى بحس بالغباء لما بتسأل السؤال اياه انت هانتنتخب مين؟
علشان لو افترضنا اننا بقينا زي اي دولة ديموقراطية في العالم و المطالب دي اتنفذت و بقت عندي ضمانات لتداول السلطة يبقى علشان اقرر هانتخب مين لازم اعرف الاتي:

1- مين هم المرشحين ؟
2- ماهو تاريخ المرشحين و خبراتهم ؟
3- و دي اهم حاجة : ماهو البرنامج الإنتخابي للمعلم اللي مرشح نفسه فتوة الحارة-معلش اصلي اليومين دول بقرا الحرافيش- و ماهي ضماناته لتنفيذ البرنامج؟

و لو لسه مفترض ان التغيرات الدستورية دي حصلت و اننا اصبحنا دولة ديموقراطية لكن حتى الان لم يرشح احد نفسه ولا عرفت هو مين و تاريخه ايه ولا ماهو برنامجه الأنتخابي اللي بعد ما اعرف ده كله اقرر ساعتها انا هانتخب مين.
لذا ما احترامي لكل اصدقائي اللي بحبهم جدا و على علاقة طيبة بيهم انا حتى الان مش فاهم هما بيأيدوا البرادعي رئيسا لمصر 2011 على اساس ايه؟
ولا اللي بيأيدوا ترشيح ايمن نور ولا عمرو موسى ولا عمر سليمان ولا حتى عمرو الدياب و جدو على اساس ايه؟ و خصوصا اللي بيأيدوا جمال مبارك هو عمل ايه؟ او ناوي يعمل ايه؟

و بما ان انا كاتب اسامي فنان ولاعب كورة و ده ايمان مني بأن كل الناس لها حق الترشيح و لكن يا ناس يا هو اولا غيروا نظام الدولة الفاسد و بعد كده خلوا كل واحد
يطلع يقول هو مين وناوي يعمل ايه و هايقدر يعمل الكلام ده ازاي و بعد كدة ولعوا سجارة مع كباية شاي واتجعصوا على الكنبة و فكروا احسن واحد فيهم مين؟
مش تتطلعوا تأيدوا و ترشحوا الناس من غير اي تفكير إلا انهم ناس كويسسن و زي الفل و واخدين جايزة نوبل او مرة في مناظرة مع وزير خارجية اسرائيل قفش عليه و كسبه في المناظرة او اتظلم واتحبس او كان هداف كاس افريقيا ولا هو الهضبة؟ ده كله عبث -من زمان نفسي اكتب الكلمة دي في بوست ليا- و مالوش لازمة و بيرجعنا لورا مش بيقدمنا . وعلى رأي البرادعي لو عندك سواق جامد و عربية جامدة بس الطريق وحش مش هاتعرف تمشي بالعربية و مش عارف علاقة الجملة دي ايه بالكلام اللي عايز اقوله بس حبيتها علشان انا بحب العربيات. فهمتوا يا جدعان انا عايز اقول ايه..؟؟؟ والنبي بقى ماحدش يسألني بعد كده انت هاتنتخب مين؟

هناك 12 تعليقًا:

mido يقول...

مفيش برنامج لأن أصلا الراجل مش حيرشح نفسه

غير معرف يقول...

أه

دماغ ماك يقول...

طب مادام اه يا عم الغير معروف اكتب اسمك

tota يقول...

حلو الكلام ... تمام كده...انا بجد ماليش فالسياسه بس بحاول يبقى ليا شويه على خفيف وعجبنى كلامك...المهم بقى..من الآخرانت هتنتخب مين؟ D:

غير معرف يقول...

انا موافقك تماما و لما الناس طلعت اتكلمت في موضوع البرادعي ده حسيت بكده بس انا من وجهة نظري ان كل ما يريده البرادعي نفسه هو فتح الباب للنقاش و تحريك الميه الراكدة زي ما بيقولوا دي وجهة نظره
الراجل مقالش خالص انه هيترشح فعلا كل ده كلام حواره مع دريم كان بصراحة من احسن الحوارات الي عملتها مني الشاذلي مع اني مكملتوش للاخر

عامة انا مقتنع جدا برأيك

Zika يقول...

انت جبت م الاخر
جبت الزتونه يعني

艾維 يقول...

精彩的文章是我停留的理由~ .........................................

Borsa يقول...

thanx for this nice blog and please let me take a copy to my site

مشاهدة مباراة مصر وانجلترا
مشاهدة مباراة مصر وانجلترا بث مباشر
مشاهدة مباراة مصر وانجلترا بث مباشر

ya يقول...

Say not all that you know, believe not all that you hear...................................................

غير معرف يقول...

Nice dispatch and this mail helped me alot in my college assignement. Thanks you seeking your information.

1985 يقول...

im in moroco nta jamil btfakir hilw- wlkini an a3rif mahoa l7l fi nadarik

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول