هياجان جنسي في الشارع.....


. على غير عادتي النهاردة بدأت تصفحي للمدونات الصديقة فتحت الوعي المصري للزميل وائل عباس..واللي شفته ماكنش على البال

.فضيحة للي ماعندوش فضيحة..مهزلة هاتضرب سمعتنا الارض

.بجد نفس التصرف اللي بتعملوا الكلاب في الشارع

...جيمي كتب عنها في التخاريف و مالك كتب و عنده صور من عند وائل عباس.... حاجة مش عارف اوصفها

حوالي الف شاب في اول يوم العيد رايحين يحضروا سنيمات و فجاءة هاجوا كلهم و حصلتلهم حالة هياج جنسي و بقوا يمسكوا اي واحدة في الشارع (الكلام دة في وسط البلد) و يخلعوا هدومها و كل واحد يحاول يحصل منها على اللي يقدر عليه ...شفتوا وساخة كدة

خلاص يا ناس...الحالة وصلت بينا للدرجة دي...اغتصاب جماعي في الشارع للبنات

محدش افتكر ربنا في الالف شخص دول

محدش خاف تتطلع اللي بتغتصب دي امه ولا اخته ولا مراته..ولا دة تبع العادة الوسخة اللي جتلنا بتاعت مادام الحاجة مش بتاعتي يبقى تتحرق الدنيا..و مش مهم اي حد تاني... دي الحالة اللي بقيت حاكمة كل تصرفاتنا في الحياة

و الامن اللي بيتصرف عليه تسعة مليار جنيه في السنة.....كان فين ؟؟ بيقولوا ان ماكانش فيه 10 عساكر في المنطقة....احنا بنتكلم على وسط البلد خالوا بالكم؟؟؟

انا مش عارف اكتب ايه....كتير كتبوا على ظروف البلد بس مهما كانت الظروف....دة مش عذر ليها

.دة اسمه مسخرة و قلة ادب من شعب مصر انه يذل نفسه و يفضح نفسه قدام العالم كله

.جاتلي تلفونات من صحابي برة مصر يسألوني

حد يقوللي ارد عليهم اقول اي؟؟؟؟؟؟؟؟؟؟؟؟؟؟؟؟
الصورة من جريد الوعي المصري

هناك 6 تعليقات:

بنـت ســعد يقول...

و كنا بنتكلم على ثورة اليقظة
خلينا واقعيين

الشعب ده قريبا مبقاش فيه منه امل

حسبي الله و نعم الوكيل

demaghmak يقول...

انا برضه يابنت سعد مش عارف ارد اقول ايه ده علي حصل
انا محرج قوي
بس اذا كان عرض الناس اللي كان مهما حصل كان منطقة محظورة عندنا كشعب حصل فيه كدة يبقى بجد دلوقت اقدر اقولك انتظري الاسواء

شــــمـس الديـن يقول...

السلام عليكم و رحمة الله و بركاتة

يا اخوانا انتوا متأكدين ان الموضوع مش اشاعة الكلام دا صحيح؟؟؟؟

يعني نفسي بس حد\ يكون من سكان وسط البلد علشان يؤكد لنا اللي حصل , لانه فيه ناس كتيرة شكككت في مصداقية اللي حصل دا

بس عامة
انا مبقيتش استبعد حاجة تحصل في بلدنا دي

مع خالص تحياتي :(

demaghmak يقول...

شمس الدين
المصادر بتاعتنا اقدر اقول اني بثق انها مش هاتهول للدرجة دي...بس سيبك من كدة
انا كتير اشوف اطفال صغيرة و شباب يكونوا في الشارع ماشين و بنت تعدي جنبهم او وسطهم و تلاقي نفسها واخدة نصيبها من ايديهم اخرها يوم ليلة القدر انا كنت ماشي في الشارع و فيه بنت جاية في وشي و طفلين على موتيسكل جايين من وراها و اول ما جم جنبها ايديهم اشتغلت عليها
عدم التربية و اختفاء التربية على ثقافة احترام الغير احد اسباب انحطاط الشعوب
و الاهم
اختفاء خشية الله

شــــمـس الديـن يقول...

طب انا هقول لك حاجة اخي الفاضل

انا كنت ساعات بروح من الشغل متأخر ( حوالي 11 و نصف ) و بمشي في حتت مش تمام و فيها العيال الليانت بتقول عليهم دول ... مرة كنت ماشية و لاقيت واحدة لابسة لبس بصراحة انا كبنت اجبرتني اني ابصلها ... طبعا كل شباب الشارع كان ملاحقها بعينة ... و هي كانت ماشية ادامي و انا لوحدي و هي لوحدها ... و كانوا بيتعرضوالها و مش بيتعرضولي ... وواحد من العيال الصغيرة دول كان جاي بجهة مقابله ليها بعجلة لما شافها اتسمر و لف و مشي وراها لحد ما ضربها ...

و اقسم بالله محدش جاء جنبي ( طبعا انا كنت بالبسة لبس محترم و محجبة و هي لأ ...

يعني الخلاصة فيه ناس وحشة زي ما حضرتك و انا شايفين .. بس انا شايفة شلة شباب واقفين ...محبكتش اعدي جنبهم او وسطهم يعني ... و الله ساعات بعدي الشارع علشان اجنب نفسي الاذي ...اه هما مش متربيين ...بس هي مسؤولية مشتركة

علي فكرة انا مشوفتش اي تغطية اعلاميية لحد النهاردة من صحف المعارضة ...و المصدر الوحيد - مالك و رضوي - و لو كانت حاجة زي دي حصلت كنت هتلاقي جرايد المعارضة او رويترز او الجزيرة او سي ان ان موجودين ...يعني دول ليهم عيون في كل حته ....

مش شايف معايا انها غريبة ان محدش يتكلم عن الموضوع دا لحد دلوقتي؟؟؟

demaghmak يقول...

شمس الدين
طبعا انا معاكي و هتجنن و اعرف مافيش حد اتكلم على الموضوع دة ليه....و كمان الناس اللي مش متابعة المدونات معندهاش اي فكرة عنه
.. بالنسبة للتلفزيونات و الفضائيات مادام معندهاش مادة مصورة مش بتزيع الخبر و بالذات حاجة زي دي....بس اللي مش فاهمه هو الجرايد...يعني في المليون جريدة معارضة ماكنش فيه منهم صحفي واحد في وسط البلد على بعد 100 متر عن نقابة الصحافين...ده مش فاهمه....
بالنسبة لموضوع البس بتاع البنات...اظن انت كابنات عارفين الموضوع دة اكتر مننا...لان لبس البنت و مشيتها في الشارع بتفرض على الشيطان نفسه احترامها يا اما عدم احترامها..
سعات ببقى حاسس اني ماشي في فديو كليب مش شارع..
و كمان مش موضوع حجاب..في بنات مش محجبة كتير و محترمين جدا و فيه بنات منقبة و مش عايز اتكلم عليهم
الموضوع يا ناس (تربية) و (دين) الناس اللي مابتتقيش ربنا في كل افعالها و اصلان مش متربين على احترام الغير دة بالنسبة للولاد و البنات كمان....فكرتيني بمحمد هنيدي في صعيدي في الجامعة الامريكية لمل قال ( يا ناس...حد يوسع البناطيل الحريمي دي)....سلام