هانلومهم ليه

اغلبنا قرينا عن الشابين المصريين اللي اتعذبوا في الكويت
و اضربوا و اتهانوا و اتحرقوا بميت نار
بس ارجوكوا محدش يقولي انه استغرب
ولا علامات الاندهاش جت على وشه
لأن اي واحد هايعمل كده يبقى لا مؤاخذة عبيط
اصل احنا يا جدعان شعب اصلان مالهوش لازمة
و مالهوش دية عند حد
اصبحنا احقر شعب منزلة
دي مش اول مرة المصريين يطحنوا في الكويت
و يطلعلنا السفير و الوزير يقلنا دي مش هاتأثر على العلاقات بين الدولتين الشقيقتين
ياخي ك* أ* الدولتين و العلاقات اللي مهزأنا وسط البشر
احنا بقينا رخاص على كل الناس
و ماحدش عليه عتاب إلا الاساتذة اللي ماسكينا
ما هما من دمنا و بيعملوا فينا اوسخ من كده
يبقى هانلوم على الغربا ليه
داحنا بيقتلونا هنا في الاقسام
مش عايزنهم بره يحرقونا
ولا يجلودونا زي السودان
بس اللي دحكني في الموضوع ده حاجتين
الاولى انهم لموا قاريبهم و خدوا جوازاتهم كمان علشان يضغطوا عليهم
يعني نفس نظامنا بالضبط
والتانية تصريحات اللي ماسك الامن عندهم
قال ايه : دي كانت تصرفات فردية
هو الاستاذ كان زميل العادلي من ايام الجيزة ولا ايه؟؟

الاهلي هو سبب كل المشاكل اللي في الحياة

كل ما تكلم واحد زمالكاوي (ربنا يرحمنا) عن نادي الزمالك

تلاقيه حول الموضع على الاهلي و خلى الاهلي هو سبب كل المشاكل اللي في الحياة ..

بما فيها فشل نادي الزمالك
و اظن كل الناس ملاحظة الموضوع ده
و يقعد يحددلك كل مساوئ الاهلي و الفساد اللي الاهلي بيعيش عليه

على مستوى العالم و محدش بيوقفه
زي يوم ماتش الزمالك و الاسماعيلي اللي فات لما جيت اكلم واحد على الماتش بتاعهم

كان رده عليا ان الاهلي يوميها اتعادل بالحظ والحكام
يعني الاهلي عقدتهم في كل حاجة حتى لو هو مش طرف في المشكلة
و ده مثال لو مقدم قابل زمالكاوي هايرد ازاي؟
المقدم : نرحب بالكابتن نجم مصر ونادي الزمالك
كنا يا كابتن عايزين نعرف اسباب ظهور نادي الزمالك بالصورة دي في الفترة اللي فاتت
الكابتن : الحقيقة ان النادي الاهلي لسه محتاج للعيبة كتيرة تملى العجز اللي عنده في الخطوط

علشان المستوى يتحسن
المقدم !!!! : هو يا كابتن عدم الاستقرار الاداري مش هو السبب؟
الكابتن : و الله الاستقرار الاداري في النادي الاهلي ده شيء وهمي و أي كلام

و هما طول الوقت بيقطعوا في بعض بس الاعلام الاحمر في مصر مش بيقول حاجة
المقدم !!!!!!!!!!!! : طب و الاستقرار الفني؟؟؟
الكابتن : شوفوا جوزيه بياخد كام الف يورو طبعا لازم يستقر
المقدم !!!!!!!!!!!!!!!!!! : في الماتش الاخير كان الزمالك افضل بس خسر هل للتحكيم دور في كده؟؟
الكابتن : الحكام الاهلوية اللي الاهلي عاملهم غسيل مخ و بيدفعلهم في كل انحاء العالم هما السبب
المقدم !!!!!!!!!!!!!!!!!!!!!!!!!!!!!!!!! : ده معناه ان المشاكل اللي في نادي الزمالك اللي كل يوم

بنشوفها في وسائل الاعلام مش هاتنتهي؟؟
الكابتن: الاعلام الاحمر هو السبب في كل المشاكل وهما اصلان مش دارسين اعلام

دول مدسوسين من الاهلي
المقدم !!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! : طب امتى الزمالك

هايفوز ببطولة؟
الكابتن : طول عمر الاهلي بيفوز بالحظ و الحكام و الاعلام و الاتحاد

و الامم المتحدة و كل الناس وقفه جنبه
المقدم !!!!!!!!!!!!!!!!!!!!!!!!!!!!!!!!!!!!!!!!!!!!!!: طبعا جماهير الزمالك

شكلها اتغير في المدرجات و بقت بتشجع فريقها بجنون في أي ظروف
الكابتن : جماهير الاهلي دي اسواء جماهير وهي دايما اللي بتبتدي أي شغب في المدرجات

و هما من زبالة الشعب و احنا انضف ناس في العالم
المقدم !!!!!!!!!!!!!!!!!!!!!!!!!!!!!!!!!!!!!!!!! : نتمنى للزمالك

حظ افضل و شكرا يا كابتن
الكابتن : مبروك للاهلي فوزه بالدوري و الكاس و السوبر و افريقيا و كل حاجة

و نتمناله التقدم علشان احنا مش بنحقد عليه

صور ...... وانشر

اكتب ايه ؟ انا مش عارف
اعمل ايه ؟ انا مش عارف
الموضوع بقه رخم قوي
هاكتب تاني عن ان اللي ماسكينا باطل و الكلام ده مابقاش فيه فايدة بحسها
مادام ماعيش صورة و صوت و ورق يبقى كله مالوش فايدة
ماحنا بقالنا مليون سنة بنتكلم و نحكي
ايه الفايدة يعني
ايه اللي اتغير
بس اول ما جبنا صوت و صورة ده اللي فرق معانا
اختراع جميل اسمه الكاميرا
ده حب حياتي بعد حبي الحقيقي
هو ده الاختراع اللي عمل فرق
و دلوقتي الحمدلله بقت في ايد كل الناس
هو ده الشئ اللي خلى الناس تغير تفكيرها
الناس مثلا كان طول عمرها تسمع عن تعذيب الشرطة
بس عمر ما حد كان شافها قبل كده
و اول ما الناس بدأت تشوف الاوساخ بيعملوا ايه
بدأوا يتكلموا و يشتكوا
و حوادث كتير بدأت تظهر هنا و هناك
كل ده علشان اللي بيشوف مش زي اللي بيسمع
الكاميرا ظهرت البلاوي اللي في بلدنا
و السلبيات من زبالة في كل حاجة
في الشارع .. في التعامل بين الناس .. في الحكومة
علشان كده انا نفسي كل اللي معاه كاميرا يصور و ينشر
لو ماعندوش مكان ينشر فيه يبعت لأي مدونة و هي تنشرله
صوروا كل حاجة وحشة في البلد الناس بتعملها
وافضحوا اي حد بيسئ لبلدنا دي
لازم الناس ترجع تتكسف تاني و تحس باللي بتعمله في البلد
البلد دي مش هاتنصلح الا لما الناس تغير طريقة الحياة الزبالة اللي عايشاها
و عايشاها بكفيها كمان
اللي بيتكلم و يحاول يغير بيغير
بس اللي منفض و مكبر هايفضل في الزبالة طول عمره
الصور و الفيديوهات يا جماعة بتغير
واسألوا كل واحد الفيديو عمل معاه فرق
انا او وائل عباس او عرباوي او جبهة التهيس
اسألونا قد ايه الصورة فرقت في تفكيرنا و حياتنا
دي دعوة مني لكل واحد في ايده كاميرا
صور ...... وانشر

والنبي اللي يعرف يعملنا بانر للموضوع ده يعملوا علشان الناس تنشره عندها

سلام