مع اني فرحان اليوميين دول علشان المنتخب
إلا إني كل يوم توصلني اخبار عن بلاوي وزارة الزابلية (من الزبالة يعني) ,,,مما يجعلني اسأل سؤال
هي العالم دي مابتفهمش؟؟ مابيعتبروش يعني
و بقيت بلاقي تقل في ايدي لما اجي اكتب عنها
بس فيه خبر تاني النهاردة و انا بقراه شدني
بس هو متعلق بوزارة تانية ,, وزارة الفاشلية (من الفشل يعني ) اظن انتوا خمنتوا دي اني وزارة
الخبر يا سادة يا كرام بيقول ان فيه سفينة مصرية اسمها بدر1 تايهة في البحر الاحمر بقالها شهر
و ان ماحدش عرف يلاقيها لحد دلوقتي
السفينة دي فيها 9 مصريين و 4 سودانيين و يمني واحد
صاحب السفينة طلع قال انهم لقوها قدام سواحل السودان
وفي ساعتها على طول طلع مساعد وزير الفاشلية و نفى الخبر
و صرح ان الوزارة مازالت تتابع اتصالاتها للعثور على السفينة
و انهم اجروا 3 عربيات نص نقل ماركة الدبابة عليها مكروفونات قعر الحلة المصرية الشهيرة
و العربيات دي نزلت تلف البحر الاحمر علشان يلاقوا السفينة
وانهم نزلوا اعلانات على القناة التامنة
وقالو ان اللي يلاقي السفينة هايدولوا شهادة استثمار ب40جنيه
والنبي ده مش هبل
بقالكوا شهر بدوروا على سفينة مش لاقينها
والسفينة مش غرقانة كمان
انا اعرف ان البحر الاحمر دة مش محيط يعني و حتى لو محيط
يعني ممكن السفينة دي تتجاب بالقمر الصناعي او بالطيارات
اما تقولي بنعمل اتصالات علشان نلاقيها؟؟؟ ده هبل
السفينة مش مستخبية عند حد
دي في البحر
يعني انا عندي سفينة فيها مواطنين تايهة بقالها شهر و الموضوع عادي كدة
انا مش عايز اتخيل ان الموضوع ده لو حصل في دولة محترمة كان ايه اللي حصل
كانت الدنيا اتقلبت ومش بعيد يعملولها فيلم بعد ما يلاقوها
بس احنا في بلد لو شعبها كله تاه ولا غرق ولا اتقتل ولا اتحرق
ولا هاتفرق معاهم
حسبي الله و نعم الوكيل
.jpg)
ليست هناك تعليقات:
إرسال تعليق