الانتخابات الامريكية

عندي سؤالين بس بالنسبة للموضوع ده
بس فكروا فيهم كويس
و كمان قبل ما تجاوبوا سيبوكم من كلام الحرية و المساواة و الكلام الي امريكا مصيحة لنفسها بيه ده
علشان فيه حسابات اخرى لما نيجي للموقع الحساس ده
مع الهيصة اللي عاملاها كلينتون و أوباما
السؤال الاول اللي جه في تفكيري:
هل هاتقبل المؤسسة الدبلوماسية الامريكية - قصدي الناس اللي حاكمة امريكا بجد - ان واحدة ست تمسك الدولة ؟
السؤا التاني :
هل هاتقبل نفس المؤسسة ان واحد اسود - افريقي امريكي يعني - يحكم البلد ؟
هما دول السؤالين اللي مش مخلييني عارف اكمل تفكير في الموضوع ده .

هناك 5 تعليقات:

Bella يقول...

انا فكرت في الموضوع ده قبل كده وشايفة ان لامدام كلينتون حد ح ينتخبها
ولا اسم الله عليه سي اوباما

انا حاسة ان الراجل التاني ابو شعر ابيض ده هو اللى ح ينتخبوه

حتى لو مش كل الناخبين عايزينه ح ينتخبوه على طريقة المضطر زي الامريكان مااضطروا ينتخبوا بوش الابن مرة تانية لان المرشح التاني كان فيه عيوب خطيرة زي حكاية موافقته على زواج الشواذ

شكلنا برضه كالعادة ح ناخد مقلب يطلع من نافوخنا

Bella يقول...

نسيت اكتب اسمه
جون ماكين

ربنا يريحنا منهم كلهم

MariaM Bent Omran يقول...

و الله يا ماكوكي كنت لسه سأله نفس السؤال ده لدكتور عندي في الجامعة

و قالي باللفظ: الأمريكان و لاد كلب عنصريين و عمر ما ست و لا أسود هيحكمهم....

سمعت كلامه و سكت

من كام يوم كلمت خالي اللي عايش في أمريكا و سألته إنت هتنتخب مين؟؟ و طنط دوروثي هتنتخب مين ( مرات خالي ): قالي باللفظ و لا مؤاخذة يعني: أكيد مش هنتخب لا المرة و لا الإسود...

و ده أكدلي كلام دكتوري

و شكرا

هههههه

zsinfulangel يقول...

loooool 5al mariam da 3asal walhe !!! heheeeeee

رأفــــتلــوجيــا الرأفتـــانى يقول...

يا ساده
شوف نتائج الانتخابات الاوليه وانت تعرف الفرق..انا عايش فى نيويورك من وانا عندى 17 سنه..
انتو فى مصر بأه بتجيبوا افكار عجيبه انا معرفش بتجيبوها منين
لو بصيت على نتائج استطلاع الرأى هتلاقى ان 93% من الشباب الابيض اللى سن الجامعه انتخبوا اوباما برغم انه اسود

وانا امبارح انتخبت هيلارى فى انتخابات الحزب

على اى حال
واحد اسود وواحده ست يكونوا اقوى المنافسين فده دليل على قوه الديموقراطيه هنا

الدور والباقى علينا اللى عندنا رئيس من قبل انا ما اتولد

وانا فعلا عاوز اعرف..لو الجن الازرق نجح فى الانتخابات الامريكيه
ده هيأثر علينا ليه؟؟

علشان حكومتنا ملهاش كلمه ولا سياده
كل حاكم محترم بيعمل لمصلحه وطنه وشعبه