فريندلي بيبول

كنت زمان قبل الدش و النت و الحاجات دي

بحب اتفرج على برنامج كده بيجي على القناة التانية الساعة 5 العصر

كان اسمه خمسة سياحة

بتيجي فيه كده مذيعة من قديم الازل علشان تقابل السياح اللي بيزوروا مصر

و تسألهم السؤال الشهير

ايه رايكم في الشعب المصري؟

و دائما كان الرد بكلمة بجملة واحدة

فريندلي بيبول

ناس طيبيين من الاخر يعني

و كنت مع ان الجملة بتكرر مع كل السياح و كل يوم

الا انها كانت بتبسطني

و كنت اجي اقرا الجرنال و اعدي على صفحة الحوادث

الاقي مثلا جرايم سرقة و رشوة و يوم ما يبقى فيه خبر جامد

الاقي ضبطية مخدرات

و يوم لما يكون فيه جريمة قتل ولا حاجة

تفضل البلد تحكي فيها اسبوع ولا اتنين

لحد ما تطلع جريمة تانية

بس دلوقتي الحال اتقلب

افتح اي جرنال تلاقي فيه 18 جريمة قتل و 10 اغتصاب

 و 8 تعذيب و 5تحرش و 3اختطاف اطفال

و في الاخر مثلا تلاقي جريمة صغيرة على جنب كده

 القبض على تاجر مخدرات (صغير) و بحوزته 2 طن حشيش و 3 طن بانجو و 7 قطع سلاح ألى

و يدوب كده كاتبين فيه اسم اظابط اللي عمل العملية

هاهاهاها

و ده خلاني اسأل سؤالين

السؤال الاول : هو خلاص مابقاش فيه حد بيسرق في البلد؟

السؤال التاني : هو الفريندلي بيبول راحوا فين؟

يكونشي في الكام سنة اللي غبتهم بره اتبدلوا بس ماقلوش لحد؟

و لكن اظن ان لقيت الاجابة بعد تفكير

اصل احنا بيحكمنا شخص مبارك

و تحتيه حد نظيف

و صوتنا اللي بيطلعه سرور

و بيصرف علينا حد غالي

و بيحمينا حبيب قلبنا

لازم الشعب تبقى ايده نضيفة

علشان كده عرفت سر اني ليه ما بقتشي الاقي سرقات في صفحة الحوادث

الفريندلي بيبول تحت القيادة المباركة المسرورة الغالية الحبيبة

مابقاش بيسرق خلاص

عدى المرحلة دي

بقى بيمارس سياسة رئاسته و حكومته

العنف و القمع و الغاء الاخر

لأن الناس كل يوم شايفة الداخلية ملهيه ازاي تأمن كرسي البيه

و سايبين الناس تاكل في بعض

ولما تيجي تتحرك

يا تقتل يا تعذب يا تخطف

فالناس منتظريين منها ايه

هيجيبوا من برة يعني

مش ده نظام بلدهم

واحنا شعب بيحب يمشي على النظام

وانا و انت

و رقصني يابن دي تيييييييييييت ال تيييييييييت

*************************

الصور من جريدتي المصري اليوم و الدستور

عدد اليوم الاربعاء 13 مايو 2009

يعني النهارده بس فيه كل ده