TRUST


مين اللي بتثق فيه؟ او إزاي بتثق في حد و ليه؟ و إمتى؟ و هل هي حاجة طبيعية ان يكون فيه ناس بتثق فيهم و يبقوا المكان اللي بتخبي فيه اسرارك و تلجاء ليهم لما تحتاج اي حاجة؟
هل انت بتثق في الناس بسهولة؟ طب و لو حد خانك ممكن ترجع تثق فيه تاني ؟ ولا بالنسبالك كدة المضوع انتهى و خلاص؟؟ هو انت انسان الناس بتثق فيه؟ يعني هل انت محل ثقة عند الناس؟؟ طب ايه الصفات اللي بتكون في الانسان اللي بتخلي الناس تثق فيه؟؟ هو اصلا ايه معنى كلمة ثقة؟ عايز اعرف
أنا مثلا بحب ناس كتيرة قوي .... بس بثق في قي تقريبا اتنين و ممكن واحد كمان - مهما كنت بحبهم - لأن تجارب الانسان في الحياة كل ما تكبر بتخلي أحساس الخوف عنده يزيد و يبدأ ياخد موقف من الناس ويقلل مثلا كشفه لأسراره إلا يا إما صديقه المقرب ( الانتيخ ) يا إما مراته با إما ولا حد
الجملة دي فكرتنيبفيلم مش فاكر إسمه لما البطل قال ( أنا بثق في اتنين بس....انا و نفسي ) و دي حاجة اكتر الناس بتعرفها
بس ليه الناس بتثق في الواحد اصلا؟؟ السؤال ده ماعرفش اجابته
يعني حصلي مثلا ان فيه واحد وثق فيا على بناته اللي معايا في الكلية و قاليخاللي بالك منهم وهو كان بيموت في العناية المركزة - و الحمدلله هو لسه عايش - مع انه عنده ابن في سني تقريبا ...مش قادر اقول ثقته فيا عملت قيا ايه؟؟الموضوع اثر فيا قوي .....هل راجل زي ده هاخون ثقته في يوم- لا - ولا على رقبتي
بس المشكلة ان لو الناس بتثق فيك ماتفكرش ان ده حاجة حلوة اد ما تفكر ان ان الموضوع ده هايزيد من مسؤلياتك كتير قوي و ساعات فوق احتمال الشخص و يوصله لمرحلة انه مايقدرش يلبي احتياجات الثقة دي و يضطر ان يخونها إلا لو هو قوي جدا
كفاية عليا كده علشان بتعب من كتابة العربي كتير على الكمبيوتر ..... و ياريت اللي عنده تجارب وعايز يشاركها معانا او رأي يا ريت يكتب
سلام

هناك 3 تعليقات:

NOHA يقول...

طيب بس ما هو فى سؤال بس عايزة اساله الأول
هو احنا فعلا بنشكى للناس همومنا علشان عايزن نفضفض بجد و عايزن نطلع اللى جوانا و لا علشان نشارك حد معانا همنا و نحملة مسؤولية النجاح و الفشل معانا يعنى بدل ما اللوم يرجع على واحد يرجع على اتنين

اما بقى مسالة انك لو قلت لحد سر و خانه هل تثق فيه مرة تانية و تقوله على سر تانى و لا لأ فاحب اقولك ان دة بيرجع لطبيعة الشخص نفسة يعنى ما هياش قاعدة ثابتة مثلا هتلاقى ناس تقول لا يلدغ المؤمن من جحر مرتين
و ممكن تلاقى شخص تانى يسامح و ينسى اللى فات و يرجع ياخد على دماغة و شخص تانى يفضل يحكيلك على اسراره لمجرد انه مش لاقى حد غيرك يعنى نظام نص العما و لا العما كله

فى الزمن اللى احنا فيه دة ما فيش حد ممكن تأمنه على سرك حتى نفسك ممكن تخونك و تلاقيها بتحكى اللى جواك فجاة كدة من غير ما تحس

bluestone يقول...

هي فعلا الثقة دي مشكلة بجد
يمكن زمان والواحد اصغر من كده كان ممكن يثق في ناس اكتر
في عدد من الاصدقاء
لكن دلوقتي افتكر العدد ده تقلص جدا
وبرضه مش كل حاجة ينفع تتقال
المقولة اللي بتقول ان السر لو خرج بره اتنين مابقاش سر صحيحة جدا

دلوقتي مافتكرش اني بثق في ناس كتير
الدنيا بتعلم الواحد بالتجربة ان الغدر صعب وقاسي جدا
دلوقتي اثق فقط بأسرتي وشخص او اتنين على الاكثر مع الحرص الدائم قدر الامكان

ولو ان بعض الناس زي حالاتي احيانا بيندفعوا في الثقة بالاخرين وبتكون مش في محلها

اما بالنسبة لسؤالك ليه مثلا مممكن تحس بثقة في إنسان زي ما والد البنات وصاك عليهم اعتقد انه لمس فيك احساس ما بالمسؤولية او ربما كان عنده رغبة في تحييدك او تحميلك مسؤولية عشان تحس بالذنب لو فكرت تكسرها

الغدر بيكون متوقع من الناس حواليك خاصة في محيط العمل
ماتخافش اكتر من الهادي المبتسم الطيب زيادة عن اللزوم ..
THE DEVIL WEARS PRADA
اليومين دول

تحياتي

دماغ ماك يقول...

bluestone
u r damn right...THE DEVIL WEARS PRADA ...