ايهاب لازم ياخد حقه من كلاب الداخلية

فاكرين الشخص ده


طب يبقى لازم تفتكره من الفيديو ده



ده ايهاب مجدي فاروق من امبابة
ايهاب يا جماعة شاب كان عنده 18 سنة لما اتصورلوا الفيديو ده
الفيديو ده امين الشرطة خد فيه سنة و الظابط طلع منها
في شهر 12 اللي فات بتحريض من الامين احمد الورداني لمأمور القسم وائل الجابري
تم تلفيق قضية لإيهاب قال ايه مسكوه ب 18 تذكرة هرويين
و بعد ما اتقطع في القسم حولوه للنيابة اللي ادتله 4 ايام و بعديها حوله للقسم اللي اتخلص منه و حوله لسجن القطا
ايهاب فضل مسجون هناك 3 اشهر ضاعوا من عمره علشان البهوات ينتقموا من اللي حبس زميلهم
و في القضية خد براءه و خرج في شهر 2 اللي فات
ده بعد ما اهله اشتكوا لوزير الداخلية و النائب العام اللي ماعملوش حاجة
مش يسيبوه بقى.. لأ ... ازاي
جاتلهم خبرية ان ابوه باع اللي وراه واللي قدامه و ادى الفلوس لإيهاب علشان يعمل بها اي شغل
ايهاب طبعا كان عامل شنط حريمي و ساب الشغل لما اتقبض عليه
قوم ايه ولاد ستين كلب في يوم 13 مايو اللي فات ده يلفقولوا قضية تاني
و راحوا بيته لقوا 9 الاف جنيه اللي ابوه كان ادهاله
قاموا ضربوا على 4 الاف جنيه و حرزولوه 5 الاف الباقين في قضية اتجار حشيش
و حولوه للنيابة اللي ادتلوا 4 ايام و بعديها قاضي المعارضات طلعوا بكفالة 500 جنيه لأنها قضية متلفقة
كل ده و ماشيييييييييييي
يجي القرار بإفراج عنه من سرايا القسم
يروح القسم الساعة 12 الضهر
مايخرجش منه الا الساعة 9 بليل
اهله لقوه خارج مش بيتكلم
ولا عارف يتنفس
و جسمه متقطع
وده مستشفى العجوزة رفضوا استقباله
القصر العيني قبله
التشخيص
كسر بالفك الاسفل
اشتباه ارتجاج بالمخ
كدمات بسائر الجسد
القفص الصدري عنده مدمر تماما
لدرجة انه اجلوا عمل العملية لنه لو خد بنج ممكن يموت
بعديها يوم التلات اللي فات اتعملتلوا العملية
و ركب شرائح و مسامير في الفك
و طبعا عمل تقارير طبية بكده
و قال انهم ضربوه على وشه بضهر الطبنجة
علشان كده فكه اتكسر
غير الشوم اللي اضرب بيها على كل حته في جسمه
عايزين بقى نجيب حق الولد ده
و الكلاب بتاعت الداخلية دي تتحبس
و يطلع مايتين اهلها
و تترفد من الخدمة
لأن العالم دي اتجنت خلاص
و مبقاش هممها اي حد
و بيخافوا مايختشوش
لازم كل الناس تفضحهم
و هما نفسهم قاولوا ادي اخرت الكلام على النت و في الجرايد
انا عايزهم يعرفوا اخرت الكلام على النت و الجرايد
ان الناس يرجعلها حقها
و الفاسدين في الشرطة
قصدي شرطة الفساد دي
لازم تتربى
و الناس تتردلها كرامتها
و تعرف مين اللي مبوظ البلد
واعتبروا ده بلاغ رسمي مني
و كل الورق موجود
****************
شكرا للصحفي كمال مراد