تكملة اللي مالهمشي فيها

بعد ما كتبت البوست اللي فات عايز اقول ان انا مش قصدي باللي مالهوش فيها انه وحش او كخة ..هو بس مالهوش فيها زي اللي مالهوش في المزيكا او في السينما .فاضل حاجة عايز الناس تعرفها
اللي حصل للمصريين بعد الماتش بتاع السودان حاجة عادية جدا و كل اللي ليه في الكورة عارف كدة. كل ماتشات الاهلي و الزمالك مثلا ضد فريق الاسماعيلي في القاهرة او الاسماعيلية دايما اتوبيسات الفريق الضيف بتتكسر بالطوب و المشجعين بتوعهم بيضربوا و بيتشتموا و بتبقى أخر بهدلة . و هانروح بعيد ليه ماكل الناس عارفة ان في ماتش الاهلي و الاسماعيلي في الدور الاول من الدوري السنة اللي فاتت جماهير الاسماعيلي كسرت الاستاد على راس لاعبي الاهلي و جماهير الاهلي فضلت محبوسة في الاستاد 4 ساعات في عز التلج من غير مياه ولا اكل بعد الماتش و كانت كل اتوبيسات جماهير الاهلي اتكسرت تماما لدرجة ان لاعبي الاهلي و جماهيره رجعت القاهرة في راكبين بوكسات الشرطة و عربيات الامن المركزي . و نفس الموضوع بيحصل لإتوبيسات الاسماعيلي اذا كانت جماهير او لاعيبة لما بيجوا القاهرة يلاعبوا الاهلي و الزمالك.
ده غير خناقات الجماهير و الضرب اللي بيصل للقتل ساعات خارج الاستادات. وفي تركيا لما كنت بحضر ماتشات كانت بتبقى حرب هناك لدرجة اني بشوف كمية عربيات اسعاف مستنية برة الاستاد تقريبا عربية لكل مشجع.
اللي خلى الموضوع يكبر قوي كده بعد هزيمتنا من الجزائر ان ( التشريفة ) اللي راحت تشجع مصر بفلوسها او بالواسطة اللي طلعتها إذا كانوا وزراء او سياسيين او إعلاميين (حد بس يقولي إزاي التلفزيون يبعت هناء شيحة دي ولا اسمها ايه اللي كانت بتعمل برنامج اغاني لماتش زي ده)او فنانين و مطربين كانت دي اول مرة يشوفوا جو ماتش حقيقي جوه و بره الاستاد. كانوا حاسبينه هايكون ماتش زي اللي بيتلعب في استاد القاهرة ب 80 الف متفرج مصري شايلنهم فوق روسهم مقابل 200 مشجع من الفريق الضيف مابتسمعهمش اصلا من كتر الناس اللي في الاستاد.
لذا فابما انهم مالهومشي في الكورة وكانوا سووو إكسايتد انهم مسافرين يشجعوا الناشيونال تييم بتاع مصر إتفاجؤا ان الحياة مش لونها بمبي في الماتشات و ان الموضوع جد بالنسبة لمشجعي الكورة الحقيقيين و إنهم اضربوا و إتكسرت اتوبيساتهم و اتبهدلوا واستخبوا و علشان هم قريبين من دائرة الاعلام فعرفوا ينقلوا مفاجأتهم دي للأعلام بسرعة فالقينا محمد فؤاد بيعيط مع عمرو اديب و كلم وزير الاعلام السوداني من موبايله و مبارك كلمه طمنه. مين فينا اصلا يعرف الناس دول مش كمان نمرهم و بنكلمهم؟؟
انا مش بقول انهم ماضربوش ولا اتهانوا بس الناس مشجعي الكورة الحقيقيين لو كانوا راحوا كانوا على الاقل عرفوا يردوا على اللي حصل و مكانش عمرو اديب عرف يكلم حد فيهم و يتصل بيه يسأله على اخبار الناس ايه و لا ريعو بتاع الاهلي كلم وزير الاعلام السوداني و اشتكاله ولا طبلة بتاع الزمالك حسني مبارك اتصل بيه و طمنه و قاله انهم هايكونوا في امان بعد ساعة.
يعني مازلت أؤكد ان اللي حصل حاجة عادية جدا و بتحصل في كل العالم بس احنا بعتنا الناس الغلط للماتش ده و دلوقتي بس كل البرامج الرياضية طالعة تقولك ليه الاولتراس ماراحوش و كانوا فين؟
دلوقتي عرفتوا قيمتهم بعد ماكنتوا بطبقوا عليهم قانون الطوارئ و بتحبسوهم قبل الماتشات المهمة واتهمتوهم بإدمان المخدرات و المثلية الجنسية و كل حاجة وسخة(مش قصدي ان المثلية حاجة وسخة علشان انا عارف هايتقال ايه في الكومنتس).
كورة القدم يا جماعة بتدار في مصر زي اي حاجة تانية بالفساد و مصلحتي فين يا عم.لما يعوزوا حد فايكبروه و يدولوا كل حاجة ولما يقلبوا عليه يعملوه كبش فدا ليهم
لو الناس اللي بتدير شئون الكورة فعلا كانوا خلوا الناس الصح هي اللي تروح ماكنش هايبقى فيه كل العياط و العويل اللي في كل القنوات و البرامج بالمستوى المتدني ده لكل الاعلاميين رياضيين كانوا او غير رياضيين و الكتاب و كل الناس اللي الوطنية فجاءة كالتهم و بقى الموضوع كرامة مصر.
هما اللي عاملوا الحبة قبة و دلوقتي احنا اللي بنلبس في الحيطة احنا و الشعب الجزائري برضه.
يا ريت الناس تفهم ان اللي بيحبوا الكورة مصريين او جزائريين كانوا فاهمين ان ده ماتش كورة مش اكبر او اقل.
بس الموضوع ان الكبار المتحكمين في شعوبهم وكل واحد بيعمل في عزبته اللي هو عايزه بينهم مشاكل و ماصدقوا لاقوا الموضوع ده علشان يصفوا خلافاتهم بينا احنا الهبل اللي مضحوك علينا.
فوقوا يا ناس و شوفوا حالكم واشتغلوا علشان تبقوا احسن بدل العياط و العويل و الخيبة اللي حارقة دم الواحد ده طول الوقت.
صحيح مافيش حاجة اسمها 5 مساكين بيلعبوا في نفس الوقت
بس ده معناه انك مالكش فيها لأنك ماكنتش عارف

هناك ٤ تعليقات:

أدهم الشرقاوى يقول...

عم ماك
أهم حاجة انك بتقول "مشجعى الكورة الحقيقيين" مش زى بعض المذيعين المتخلفين اللى يقولك "الصيع بتوع منطقة كذا و كذا" فى منتهى العنصرية والطبقية.
شكرا

MADO يقول...
أزال المؤلف هذا التعليق.
Borsa يقول...

جزاك الله كل الخير يا غالي علي المدونه الرائعه

و دي قائمه باهم مباريات اليوم يا جماعه و شكله يوم كروي عالمي

مشاهدة مباراة الاهلى والاسماعيلى
مشاهدة مباراة الزمالك والمصرى
مشاهدة مباراة برشلونة واسبانيول
مشاهدة مباراة ريال مدريد وفالنسيا
مشاهدة مباراة مانشستر يونايتد واستون فيلا
مشاهدة مباراة تشيلسي وايفرتون
مشاهدة مباراة الاهلى والاسماعيلى بث مباشر

Borsa يقول...

الف الف شكر علي هذه المدونه الرااااااائعه بارك الله فيك

Childrens Fancy Dress
نتيجة الشهادة الابتدائية
نتيجة الشهادة الابتدائية
نتيجة الشهادة الابتدائية محافظة حلوان
نتيجة الشهادة الإبتدائية محافظة الجيزة
نتيجة الشهادة الابتدائية محافظة الااسكندرية
نتيجة الشهادة الاعدادية
اخبار اليوم
العاب
نتيجة الشهادة الابتدائية 2010
حفل تكريم المنتخب